Malu Barry, Nagbalik-Entablado Matapos Malampasan ang Stage 3 Cervical Cancer

• Ni Mercy Lejarde

Back to normal na ang buhay ng singer-actress na si Malu Barry matapos niyang matagumpay na malampasan ang Stage 3 cervical cancer noong nakaraang taon.

Halos isang taon sumailalim sa gamutan si Malu matapos niyang malaman na mayroon siyang cancer. Kabilang sa kanyang mga pinagdaanan ang chemotherapy at radiation therapy.

Sa kabila ng matinding gamutan, nanatiling positibo si Malu. Kapansin-pansin din na hindi nagbago ang kanyang kagandahan at hindi rin siya nakalbo dahil sa chemotherapy. Higit sa lahat, nanatili ang kanyang magandang boses na patuloy niyang ibinabahagi sa kanyang mga tagahanga.

Bilang pasasalamat sa panibagong pagkakataong ipinagkaloob sa kanya at bilang bahagi ng kanyang pagbabalik-entablado, muling aawit si Malu sa isang espesyal na concert na pinamagatang “Simply ’D Best.”

Ang concert ay gaganapin para sa benefit ng Cancer Society of the Philippines sa BAR 1X, Molito Alabang Lifestyle Center, sa September 3, 2026, alas-8 ng gabi.

Makakasama ni Malu sa espesyal na gabing ito ang kanyang mga kaibigan at special guests na sina Patricia Javier, Mike Austria, Kathy Mas, at Miguel Aguila.
Kasama rin sa pagtatanghal ang Project Band, na binubuo nina Janice, Jigger, Rona, at Judee.

Samantala, ang musical directors ng concert ay si Jerrico Manijayme.

Malaking pasasalamat din ang ipinapaabot ni Malu sa mga sponsors na sumusuporta sa kanyang concert at sa layuning makatulong sa mga cancer patients, kabilang sina Judee, Chuck, Aficionado, Doc. Rob, Vitality, Dean & DeLuca, Beaife Hayen, K, IMCA, Bioessence Antipolo, Showtime Library, 30 Benji’s Crib, R Manila, Resteber, at iba pa.

Para kay Malu Barry, ang pagbabalik niya sa entablado ay hindi lamang isang concert kundi isang celebration of life, faith, gratitude, and hope—isang patunay na matapos ang isang mahirap na laban, posible pa ring muling mangarap, umawit, at magbigay-inspirasyon sa iba.