4 retired SC justices magbibigay ng mga legal opinion sa voting threshold sa impeachment trial

MAGBIBIGAY ang apat na retiradong Supreme Court justices ng ekspertong legal na opinyon sa bilang ng boto na kailangan para ma-convict o ma-acquit si Vice President Sara Duterte sa impeachment trial.

Tatlo sa kanila ang personal na haharap sa impeachment court sa Setyembre 16, sina dating Chief Justices Artemio Panganiban at Renato Puno, at retired Associate Justice Adolf Azcuna.

Magsusumite naman ng legal memorandum si Dating Chief Justice Hilario Davide Jr., na namuno sa impeachment trial ni dating Pangulong Joseph Estrada noong 2000 hanggang 2001.

Kasunod ito ng apela ni Senator-Judge Erwin Tulfo sa ruling ni presiding officer Chiz Escudero na nangangailangan ng 16 na boto para ma-convict ang isang impeachable official.

Kinuwestiyon ni Tulfo ang threshold dahil sa patuloy na kawalan ng apat na senator-judges, Sina Jinggoy Estrada, Rodante Marcoleta, Bato dela Rosa at Loren Legarda.

Sa Setyembre 16, maaaring magtanong ang senator-judges sa mga Amici Curiae matapos ilahad ang kanilang legal advisories.

Sa Setyembre 23 naman, magkakaroon ng tig-15 minutong oral arguments ang house prosecution at defense panel bago bumoto ang impeachment court sa apela at tuluyang resolbahin ang usapin sa voting threshold.