ROAD CLOSURES SA PALIGID NG PICC AT CCP, PANSAMANTALANG ISASARA SA GAGANAPIN NA ASEAN SUMMMIT SA PASAY

PANSAMANTALANG isasara sa mga motorista ang ilang kalsada sa Pasay City bilang bahagi ng paghahanda para sa 49th Association of Southeast Asian Nations (ASEAN) Summit at Related Summits na gaganapin sa Nobyembre 2026.

Ang mga maaapektuhang kalsada ay ang mga nasa paligid ng Philippine International Convention Center (PICC) at Cultural Center of the Philippines (CCP) na magiging venue para sa ASEAN Summit at Related Summits, ayon sa Pasay Traffic and Parking Management Office.

Mula Oktubre 24 hanggang Nobyembre 9, 2026, ipapatupad ang bahagyang pagsasara ng kalsada. Ang kabuuang pagsasara ng kalsada ay magkakabisa mula Nobyembre 9 hanggang 20.

Ang mga bahagi ng mga sumusunod na kalsada ay isasara sa mga nasabing petsa:

J.W. Diokno Blvd.
Atang Dela Rama Street
Pedro Bukaneg Street
Vicente Sotto Street

Pinayuhan ng Pasay City government ang mga motorista at commuter na iwasan ang Macapagal Boulevard, World Trade Center area, Diokno Boulevard, at ilang bahagi ng Roxas Boulevard dahil sa inaasahang matinding trapiko kasunod ng mga pagsasara ng kalsada.

Pinayuhan din nito ang publiko na maglaan ng mas maraming oras para sa paglalakbay sa nasabing panahon, gumamit ng mga alternatibong ruta, at sundin ang mga alituntunin na inilabas ng mga awtoridad.

Samantala, pansamantalang gagamitin ang bus lane bilang ASEAN lane para sa mga delegado at opisyal na dadalo sa ASEAN Summit 2026.

Ang mga empleyadong nagtatrabaho sa mga apektadong lugar sa kabilang banda ay papayagang pumasok sa mga saradong kalsada kapag ipinakita ang kanilang mga valid company ID.

Nauna nang inanunsyo ng Metropolitan Manila Development Authority ang moratorium sa mga road excavation works sa Metro Manila simula Nobyembre 1 para mabawasan ang mga abala sa nalalapit na pagho-host ng ASEAN Summit.

Magiging epektibo ang moratorium hanggang hatinggabi ng Disyembre 23 upang mabawasan din ang mga kaguluhan sa kalsada sa panahon ng Pasko.

Nauna nang idineklara ng Malacañang ang Nobyembre 16 hanggang 18 bilang special non-working days sa National Capital Region kaugnay ng pagho-host ng bansa sa ASEAN at mga kaugnay na summit. Ito ay upang matiyak ang kaligtasan at seguridad ng mga kalahok sa mga summit.

Bukod dito, sinabi ng MMDA na pansamantalang sususpindihin ang pag-iisyu ng mga permit para sa mga fun run, motorcade, prusisyon, at mga katulad na pampublikong kaganapan mula Oktubre 24 hanggang Nobyembre 20. (JOJO SADIWA)