TAN, PINURI ANG MABILIS NA PAGTUGON NI MERCADO; NANAWAGAN NG PANGMATAGALANG SOLUSYON SA PAULIT-ULIT NA KRISIS SA MGA OSPITAL SA SAMAR

NAGPAHATID ng pasasalamat at papuri si Samar Governor Sharee Ann Tan kay Health Secretary Edwin Mercado sa mabilis na pagtugon nito sa matinding pagsisikip ng dalawang pangunahing pampublikong ospital sa lalawigan.

 

Kasabay nito, nagpahayag si Tan ng tiwala  sa pamumuno ng kalihim, na ang agarang tulong ay masusundan ng mga pangmatagalang hakbang upang mapabuti ang serbisyong pangkalusugan sa Samar.

Ayon kay Tan, ang agarang pagbibigay-pansin ni Mercado sa kanyang panawagan ay isang magandang palatandaan ng kahandaan ng pambansang pamahalaan na tugunan ang matinding pangangailangan ng mga pasyente sa Calbayog District Hospital at Samar Provincial Hospital.

“Ang mahalaga sa amin ay pinakinggan ni Secretary Mercado ang aming mga hinaing at agad siyang tumugon. Lubos naming pinahahalagahan ang kanyang personal na pagbibigay-pansin sa sitwasyon at ang mga agarang hakbang na kanyang ipinag-utos. Umaasa kami na sa ilalim ng kanyang pamumuno, magkakatuwang naming mahahanap ang mga pangmatagalang solusyon para sa aming mga pasyente,” pahayag ni Tan.

 

Binigyang-diin ng gobernador na ang pangunahing hamon ngayon ay matiyak na ang mga agarang hakbang ay masusundan ng permanenteng pagpapalawak ng kapasidad ng mga ospital, pagpapahusay ng mga pasilidad, pagdaragdag ng makabagong kagamitang medikal, at pagpapalakas ng bilang ng mga doktor, nars at iba pang kawani.

 

Batay sa mga opisyal na ulat ng mga ospital noong Oktubre 19, umabot sa 181 ang bilang ng mga pasyenteng naka-confine sa Calbayog District Hospital kahit 75 lamang ang awtorisadong bilang ng kama nito.

 

Samantala, ang Samar Provincial Hospital sa Catbalogan City ay tumatanggap ng humigit-kumulang 200 hanggang 250 pasyente sa kabila ng awtorisadong kapasidad nitong 100 kama lamang.

 

Dahil sa matinding pagsisikip, labis na nahihirapan ang mga ospital, pati na ang mga doktor, nars at iba pang healthcare worker, na tugunan ang pangangailangan ng mga pasyente.

 

Kasunod ng panawagan ni Tan noong Oktubre 26, inatasan ni Mercado ang DOH Eastern Visayas na maghanda ng agarang tulong, kabilang ang pansamantalang matutuluyan ng mga pasyente, mga emergency medical team, at karagdagang mga kawani ng ospital.

Ipinag-utos din ng kalihim ang pagsusuri sa pagsisikip ng mga ospital at sa sistema ng paglilipat o pagre-refer ng mga pasyente sa iba pang pagamutan.

 

Kinilala ni Tan ang mga direktibang ito sa kanyang follow-up letter noong Oktubre 30. Hiniling din niya ang mas mahigpit na koordinasyon at malinaw na iskedyul ng pagpapatupad ng mga kinakailangang hakbang.

 

“Malaking tulong ang mga pansamantalang pasilidad at emergency medical team upang maibsan ang kasalukuyang sitwasyon. Ngunit hindi tayo dapat tumigil sa mga agarang solusyon lamang. Kailangan natin ng mga pangmatagalang hakbang—mas malalaking pasilidad, mas maraming kama, makabagong kagamitang medikal, at sapat na bilang ng mga doktor at nars—upang matiyak na natatanggap ng ating mga kababayan ang de-kalidad na serbisyong pangkalusugan na nararapat sa kanila at upang hindi na maulit ang ganitong krisis sa ating mga ospital,” ani Tan.

 

Nagpahayag din ng pag-asa ang gobernador na mapapabilis ng pambansang pamahalaan ang pagpapalabas at paggamit ng P440 milyon na nakalaan na sa pambansang budget para sa pagpapahusay ng dalawang ospital.

 

Sa nasabing halaga, P140 milyon ang inilaan sa ilalim ng 2025 General Appropriations Act para sa Calbayog District Hospital. Kabilang dito ang P70 milyon para sa pagpapahusay ng mga pasilidad at imprastraktura at P70 milyon para sa mga kagamitang medikal.

 

Bukod dito, P300 milyon naman ang inilaan sa ilalim ng 2026 national budget para sa mga proyektong pang-imprastraktura sa Samar Provincial Hospital.

 

Samantala, binigyang-diin niya ang kahalagahan ng agarang pagkumpleto sa mga kinakailangang proseso at dokumento upang hindi mawalan ng bisa ang nasabing alokasyon.

 

Sinabi ni Tan na nananatili ang kanyang tiwala kay Mercado, na nagpakita na ng malasakit sa pamamagitan ng mabilis na pagtugon sa krisis sa mga ospital sa Samar.

 

Umaasa siyang bibigyan din ng kalihim ng kaukulang pansin ang mga usaping humahadlang sa pagpapatupad ng mga proyektong magpapahusay sa mga ospital.

 

Binigyang-diin ng gobernador na kailangang sundin ang mga batas, regulasyon at mga patakaran upang matiyak ang wastong paggamit ng pondo ng bayan.

 

Gayunman, sinabi niyang ang mga suliraning administratibo ay dapat lutasin sa pamamagitan ng pagtutulungan at mga praktikal na hakbang, sa halip na maging dahilan ng pagkaantala ng mga proyektong lubhang kailangan ng mga pasyente.

 

Umaasa rin si Tan na magtutulungan nang mas mahigpit ang Department of Health at Department of Budget and Management upang maresolba ang mga natitirang kinakailangan at makapagtakda ng malinaw na iskedyul para sa pagpapatupad ng mga proyekto.

 

Muling tiniyak ng gobernador ang kahandaan ng pamahalaang panlalawigan na makipagtulungan sa mga pambansang ahensiya, kabilang ang pag-aaral sa mga posibleng kasunduan para sa pagpapatupad ng mga proyekto alinsunod sa umiiral na mga batas at regulasyon.

 

Binigyang-diin ni Tan na ang tunay na layunin ay hindi lamang ang pagpapalabas ng pondo kundi ang matiyak na ang mga alokasyong ito ay magbubunga ng mas maayos na mga pasilidad, karagdagang kama, makabagong kagamitang medikal at mas mahusay na serbisyong pangkalusugan.

 

“Ang ating iisang layunin ay matiyak na ang tulong na inilaan na sa pambansang budget ay makarating sa mga ospital at, higit sa lahat, ay tunay na mapakinabangan ng mga pasyente at pamilyang lubhang nangangailangan nito,” ani Tan.

 

Nagpahayag ng pag-asa ang gobernador na sa pamumuno ni Mercado, sabay na maisusulong ang agarang tulong at ang mga pangmatagalang pagpapahusay sa mga ospital upang makapagbigay ng tunay at pangmatagalang ginhawa sa mga pasyente at kanilang mga pamilya sa Samar.