3 dating gov’t executives kulong ng 28 years sa P4.8m PDAF

HINATULAN ng Sandiganbayan ang tatlong dating government executives ng graft at malversation hinggil sa paglabas ng Priority Development Assistance Fund (PDAF) ng isang mambabatas na nagkakahalaga ng P4.8 million sa isang non-governmental organization noong 2007.

Nasentensiyahan ng First Division ng Sandiganbayan nitong Lunes sina dating Technology and Livelihood Resource Center (TLRC) deputy general Dennis Cunanan, dating sales and promotion supervisor Belina Concepcion, at dating chief accountant Marivic Jover ng 6 years hanggang 10 years para sa graft, at 10 years hanggang 18 years para sa malversation of public funds.

Ang tatlo ay inatasan ding isoli sa gobyerno ang P4.8 million na may legal interest, base sa 72-page ruling na pinirmahan ni First Division chair Associate Justice Efren De La Cruz, na sinang-ayunan nina Sandiganbayan associate justices Geraldine Faith Econg at Arthur Malabaguio.

Ang pondo ay bahagi ng PDAF ni dating Palawan Representative Antonio Chanes Alvarez.

Sa pag-convict kina Cunanan, Concepcion at Jover sa graft, nakita ng korte na mayroong “manifest partiality, evident bad faith or gross inexcusable negligence” sa parte ng mga ito sa pagpayag sa “anomalous disbursement” ng P4.8 million sa Kalinga sa Kapwa at Kalikasan Foundation, Inc. (KKKFI), kahit na ang NGOs ay hindi kabilang sa mga otorisadong implementing agencies ng PDAFsa ilalim ng 2007 General Appropriations Act.

“As a general rule, all procurements must be done through competitive public bidding, except as provided under alternative modes of procurement. Procurement of the services of an NGO that will implement a PDAF project is not one of the alternative modes of procurement,” sabi sa decision.

Si dating Congressman Alvarez ay hindi kasama sa mga kinasuhan ng Ombudsmansa anti-graft court.