Parak ‘killer’ ng brgy. chairman sa Leyte, kinasuhan

ISINAMPA na sa Leye Provincial Prosecutors Office ang reklamo laban sa isang pulis na isinasangkot sa pagpatay sa isang barangay chairman sa bayan ng San Isidro.

Kinilala ang suspek na pulis na si Manuelito Sidaya, dating nakatalaga sa naturang bayan.

Base sa sinumpaang-salaysay ng barangay tanod na itinago sa alias “John”, kabilang si Sidaya sa mga pumatay kay Elizalde Tabon, punong barangay ng Barangay Daja Diot noong Pebrero 24.

Sinabi pa ng testigo, kasama niya ang biktima sa barangay hall nang dumating ang apat na salarin sakay ng dalawang motorsiklo. Pagkababa, agad binaril ng apat sina Rusty Andoy Salazar at Alex Bacor na nasa pintuan.

Kasunod nito, pinasok ng apat ang kuwarto at pinagbabaril sina Tabon at Kagawad Paolo Mendero.

Sinabi ng testigo na nakilala niya ang suspek na pulis dahil madalas niya itong makita sa mga checkpoint noong kasagsagan ng pandemya.

Nabuhay lang, aniya, siya dahil nagawa niyang makatakas sa pamamagitan ng pagtalon sa bakod.

Ayon dito, kilala niya si alias “Opaw” dahil madalas niya itong makita sa checkpoint sa San Isidro noong panahon ng pandemya.

Nabatid na ang suspek ay iniuugnay din sa pagpatay kay dating Municipal Administrator Levin Bambam Mabini noong 2019 election period.