PANAGUTIN ANG MAY SALA

Sa pag-uusisa ng mga kapulungan hinggil sa mga multong proyektong pinagkakitaan ng mga kinatawang bayan, ganap na napapansin ang bugok na kapulungan sa media at social media. Sa dami ng lumalabas at napapanood na “video clip” sa pagdinig hinggil sa anomalya ng proyekto sa “flood control” tila hilong talilong si Mang Juan o ang bayan sa kung ano o sino ang paniniwalaan. Magkakasalungat ang mga pahayag at impormasyon naglalabasan na tila ang layon ay lituhin ang bayan. Walang kakabigin at itutulak si Mang Juan higit ang mga silip na kinatawan na may ibig pagtakpan sa usaping nasa harap. Sa pagdinig, iisa ang pumapasok sa isip, bayan ang kakarga sa kurakutang nagaganap sa pamahalaan. Walang pakinabang ang tao sa laylayan sa bangayan ng mga panig sa pagdinig at sa dulo ng pagdinig, dilis o dulong ang mahuhuli na gagawing daing sa huli. Pasalamat kung may hitong bakla na walang kilay ang maisasama sa daing na ihahain.

Sa totoo lang, malakas ang dating ng media at social media sa paghubog ng kaisipan ng balana higit sa usaping nasa harap ng bayan. Ang pagsala sa ibig na impormasyon na umaayon sa panig ng kung sino’y ang pagtatakip sa katotohanan ng ‘di makita ng balana na huhugis sa paniniwala. Ang palihis sa paglalahad ng kalat sa media at social media ang kinababaliwan ng taong bayan na nabibigyan ng malawak na oras gamit ang salaping nakulimbat. Gagawin ang lahat higit ng may sala at nang ilang kakampi upang ipakita na malinis ang gawa at para sa kagalingan ng bayan. Sa pagdinig, ganap ang balitaktakan ng mga kinatawan na tila duelo na ang mga panauhin ang tuwirang tinutudla na tatanggap ng tingga. Ang kabi-kabilang pagtatanong ng mga umuusisa sa mga panauhin ang ganap na nagpapalito na tuwirang nagpapabago sa pahayag na tuwirang layon ng pagdinig ng mapagtakpan ang katotohanan higit ng mga nakikinabang sa pagdinig.

Sa totoo pa rin, mahirap ang humarap sa pag-uusisa na ‘di malinaw ang patunguhan higit ‘di batid ang dalang layon. Ang magkakaibang layon sa pag-uusisa ang ganap na balakid sa paglabas ng inaasahang katotohanan na inaasahan sa pagdinig. Ang pagbabalitaktakan ng mga kinatawan ang ganap na larawan na mailap na makamit ang katotohanan sa salang panlulustay ng salaping bayan. Silip na ang katotohanan sa harap at likod ng katiwalian ngunit may mga kinatawan na pilit na inililihis para sa pansariling kagalingan maging sa kakampi, at ng masabihang safe ka na. Sino ang nasa tamang isip na ilihis ang usaping nasa harap kung hindi ang may malaking pakinabang sa usapin ng multong proyekto? O’ sadyang hilo at wala sa wisyo ang kinatawang “bobo” dahil sa laki ng halagang pangako kapalit ng pagka-abswelto sa haharaping kaso.

Matarik ang landas patungo sa katotohanan higit ramdam ang pisilan sa mga humaharap sa pagdinig higit kung may pinagtatakpan o kinikilingan. Masasabing wala sa pagdinig ang paglalahad ng katotohanan higit kung may tama sa nag-uusisa at walang takits sa ibang nag-mamagaling na nag-uusisa. Hindi tanggap na kaganapan na magsabi ng katotohanan na makakasakit sa mga taong sabit sa usapin higit nasa harap at kasama sa umuusisa. At ang ganap na balakid sa pagsasabi ng pawang katotohanan sa mga pangyayari sa likod ng mga anomalya. Sa totoo, masakit ang mga pahayag na nagsasabit sa ngalan ng pinabababang si Mang Roman ng Kamara na dinadaluyan ng mga parating na male-maletang salapi. O’ isang paglilihis sa katotohanan ng mailayo ang ibang ngalan sa usapin na pinag-uusapan ng bayan. O’ sadyang tunay na dapat palalimin ng mabatid ang katotohanan sa likod ng mga pahayag. O’ tunay na kailangang bigyan pansin ‘di lang ng mga kapulungan higit ng ehekutibo na unang naglabas ng usapin sa harap ng bayan.

Lumalaon lumalalim ang usapin at maraming ngalan ang naglabasan na nakinabang kuno sa mga multong proyekto. Sa pagtingin, masasabing nakaayos ang kaganapan o ang pagdinig ayon sa ibig ng kung sino. Lumalalim ang usapin at humihirap arukin ang kaganapan sa pagsulpot ng mga ngalan na sasabit sa pandarambong sa kaban ng bayan. Ang usapin sa pandarambong ang humahati sa Pinoy na pinadadaan sa media’t social media. At silip ang pananahimik ng iilan na lumalabas ang ngalan, higit sa pagdinig sa kasalukuyan. Nananalig na ang katototohanan ang magbibigkis sa Pinoy na umay na sa korapsyon sa pamahalaan sa mahabang panahon. Ang kaganapan ng mga pagbaha sa bansa sa bilyon bilyong salapi na bumaha sa lukbutan at kabahayan ng mga duhapa ang gawa ng sanlumikha sa paghahanap ng katotohan at mapanagot ang may sala.

Sa totoo lang, naganap ang panunupil sa katotohanan sa panahon ng pamahalaan ng kaTimugan, ang bigong laban sa droga. Ang kaliwa’t kanang pagpatay sa ‘di kasapakat ng lider ng kaTimugan ang kinatakutan ng bayan na ginamit sa panunupil ‘di lang sa mga lulong sa droga higit sa kamulatan ng bayan sa pamamahala. Walang umusisa o naglabas ng mga anomalya sa pamahalaan sa takot na humandusay sa lansangan. Ganap ang takot ng bayan sa lider na lantaran ang pananakot ng patayan na gamit sa pagpapatikom sa kamulatan ng bayan. At nang mapalitan, tila nabitbit ng anak ang yabang ng ama na patuloy ang mapaninindak na pahayag higit sa mga ‘di ayon sa kilos at paggamit sa “confidential fund” ng tanggapan.

Bilang panghuli, ang nakatabing na pangungulimbat sa kabang bayan na may ngalang Confidential and Intel Fund, insertion, unprogrammed fund at iba pa, ang itinanim sa nakaraan ang gamit ng mga buktot sa kasalukuyan. Ang pasanin ng tao sa laylayan mula sa pandarambong ang pilit na tinatakpan ng mga buktot na sasabit sa pag-uusisang nagaganap. Salamat, sa iilang matuwid na Pinoy na bitbit ang usapin ng korapsyon na itinatago sa nakakarami ang dapat pahalagahan ng media’t social media. Panahon na wakasan ang panlililo ng iilan para sa sariling pakinabang at dapat panagutin sa salang gawa. Batid ng bayan ang usapin habang lumalaon ay lumalalim ang korapsyon. At ‘di mag-aatubili na kumilos upang mapanagot ang may sala, maging sino ka man.

Maraming Salamat po!!!!