Advertisers

Advertisers

NAIA cargo congestion, wakas na! BOC at PairCargo, balik normal ang operasyon

0 151

Advertisers

“Masaya kong opisyal na ipinapahayag na tuluyan nang natapos ang pagsisikip ng daloy ng kargamento sa NAIA!”

Ito ang pahayag ni Customs Commissioner Ariel F. Nepomuceno noong Agosto 28, 2026, na nagpapatunay na naibalik na sa normal ang operasyon ng kargamento sa Ninoy Aquino International Airport (NAIA).

Naging posible ito sa pamamagitan ng magkakaugnay na pagsisikap ng Bureau of Customs (BOC), People’s Air Cargo & Warehousing Co., Inc. (PairCargo), at iba pang kinatawan ng industriya na nagtulungan upang matiyak ang maayos at napapanahong paggalaw ng mga kargamento at matugunan ang mga naging hamon sa operasyon.



Ang pagbangon ng operasyon ay bunga ng tuloy-tuloy na mga hakbang na isinagawa ng BOC-NAIA, katuwang ang PairCargo at mga negosyante at iba pang stakeholder sa kalakalan. Kabilang dito ang pagpapabilis sa pagproseso at paggalaw ng mga kargamento, pagbibigay-prayoridad sa mahahalagang shipment, mahigpit na pagmamanman sa kondisyon ng mga bodega, at agarang pagtugon sa mga suliraning pang-operasyon.

Malaki rin ang naging papel ng PairCargo sa pakikipagtulungan sa BOC-NAIA upang maibsan ang naipong mga kargamento sa bodega at maipatupad ang mga hakbang para maibalik ang episyente at maayos na operasyon. Ang pakikipag-ugnayan nito sa Customs, mga importer, customs broker, logistics provider, at iba pang stakeholder ay nakatulong nang malaki sa pagpapabilis ng pagpapalabas ng mga kargamento at pagbawas ng pagsisikip.



Malugod na tinanggap ng mga kinatawan ng industriya ang paglutas sa problema at pinuri ang mabilis na pagtugon ng BOC, lalo na ang direktang pakikipag-ugnayan nito sa mga kumpanyang umaasa sa napapanahong pagpapalabas ng mahahalagang shipment.

Ayon kay Ralph Morales, Country Director for Government Relations and Public Affairs ng Texas Instruments Philippines, agad na nakita ng kanilang kumpanya ang epekto ng mga hakbang ng BOC sa kanilang mga kritikal na shipment.



“Ang inyong interbensyon, kahandaang direktang makipag-ugnayan, pagbibigay-prayoridad sa beripikasyon ng aming mahahalagang shipment, at pakikipagtulungan sa amin at sa aming logistics team nang may agarang aksyon ay nagbigay-daan upang maipalabas namin ang 99% ng mga kritikal na shipment sa loob lamang ng ilang araw,” ani Morales.

Dagdag pa niya, “Ang mabilis na pagtugon na iyon ay hindi lamang nagpalabas ng mga kahon mula sa bodega; naprotektahan nito ang aming mga linya ng produksyon, ang trabaho ng mahigit 4,500 empleyado, at nabawasan ang posibilidad ng malaking epekto sa aming kita sa pangmatagalan.”

Binigyang-diin din ng Semiconductor and Electronics Industries in the Philippines Foundation, Inc. (SEIPI) ang kahalagahan ng mabilis na pagtugon ng pamahalaan sa pangangalaga sa sektor ng pagmamanupaktura ng bansa at pagpapanatili ng maaasahang supply chain.

“Taos-puso kaming nagpapasalamat sa BOC, DOF, PEZA, at sa lahat ng katuwang mula sa pamahalaan at industriya, at siyempre sa PairCargo, sa pagtugon sa problema ng pagsisikip,” pahayag ni SEIPI External Affairs Lead Cristjan Bael.

Samantala, pinuri naman ni Greg Sebastian, Pangulo ng Philippine Multimodal Transport and Logistics Association Inc., ang BOC dahil sa maagap at nakatuon sa solusyon nitong paraan ng pagtugon sa problema sa kargamento.

Aniya, “Gusto ko rin pong pasalamatan ang inyong District Collector. Kasi sa totoo lang po, lahat ng nangyayaring ito, wala naman pong kinalaman ang BOC. Ito po ay congestion ng port operators at pinanggalingan. Pero nag-proactive po sila. Sila ang gumawa ng solution at sila po ngayon ang nagpapalabas pa ng, ‘Andito na ang cargo mo na dapat palabasin mo.’ Ipinapakita lamang nito kung gaano sila kaagap kumilos.”

Nagbahagi rin ng kani-kanilang karanasan ang Healthcare Technology Association of the Philippines, Pharmaceutical & Healthcare Association of the Philippines, Toyota Motor Philippines, at Samsung Philippines noong panahon ng problema sa kargamento. Ipinahayag nila ang kanilang pagpapahalaga sa koordinadong pagsisikap ng BOC, PairCargo, at iba pang stakeholder sa paglutas ng mga suliraning pang-operasyon at pagbabalik sa napapanahong paggalaw ng mga shipment.

Tiniyak naman ni BOC-NAIA District Collector Atty. Maria Yasmin M. Obillos-Mapa at PairCargo Special Deputy Collector Dr. Siegfred “Yeye” Manaois sa mga stakeholder na patuloy na pananatilihin ng Port of NAIA ang mga positibong resulta ng mga isinagawang hakbang at gagawin ang lahat upang hindi na maulit ang mga problemang nakaapekto sa operasyon ng kargamento.

“Para sa Port of NAIA, isa lang naman din po ang maa-assure namin, na gagawin namin ang lahat para hindi na muling mangyari ang ganitong sitwasyon,” pahayag ni Obillos-Mapa.

Dahil mahalaga ang tuloy-tuloy na supply chain, lalo na para sa mga industriyang nangangailangan ng mabilis na pagdating ng mga materyales gaya ng semiconductor at electronics, hinimok ni Commissioner Nepomuceno ang mga negosyo na agad ipagbigay-alam sa BOC ang anumang suliraning pang-operasyon upang maresolba ang mga ito bago pa lumala.

“Sabihin ninyo sa amin kung ano ang inyong mga alalahanin. Sabihin ninyo sa amin kung ano ang makatutulong upang umunlad o maging mas matagumpay ang inyong mga negosyo. Sa sandaling maramdaman ninyo ang inyong mga problema, ipaalam ninyo agad sa amin—tinitiyak ko sa inyo na gagawin namin ang aming makakaya upang maresolba ang inyong mga suliranin,” diin ni Commissioner Nepomuceno.

Ngayong naibalik na sa normal ang operasyon, tiniyak ni Commissioner Nepomuceno sa mga stakeholder na patuloy na mahigpit na susubaybayan ng BOC ang paggalaw ng mga kargamento, pananatilihin ang koordinasyon sa mga cargo handler at katuwang sa industriya, at agad na tutugunan ang mga suliraning pang-operasyon bago pa man ito lumala.(BP)