PANINDIGAN ANG PAHAYAG

Sa pagmamahal sa bayan, ‘di naiibigan ang usad pagong na katarungan sa pagpapanagot sa mga tiwaling opisyal na ‘di nasiyahan sa milyon milyong nadugas, tinaas pa sa bilyon – bilyon. Sa bagal ng pagpapanagot, tila nakakuha ng lakas ng loob ang mga opisyal at nagawang magpahayag na mula kay Jun Singhot ang utos ng pagsiksik ng pondo sa GAA. Ginawa ang paglalahad sa pamamagitan ng mga video na ‘di batid ang lugar na pinanggalingan o pinagmulan. Matalas ang pahayag na sinasangkot ang pangulo ng bansa sa anomalya, muli, ang pagsiksik ng pondo sa GAA. Malaman ang inilahad ngunit walang saysay sa dahilan na ‘di natiyak ang kagalingan ng impormasyon na masasabing naglulubid ang nagpapahayag upang makahulagpos sa napasukang usapin. At ang inaasahan sa nagpahayag, umuwi, harapin ang hamon at magsumite ng sinumpaang salaysay ang tamang gawin ng masabing sadyang makatotohanan ang banggit.

Sa kabilang banda, umusbong ang pag-aalinlangan ng bayan sa bagal ng usad ng nagsiwalat ng katiwalian gayong abot-kamay ang katarungan na hanap ni Mang Juan. Sa bagal ng usad ng usapin ng katiwalian, tele-drama o zarzuela ang nasisilip na nagaganap na pinasasaya’t pinasasabik ang bayan sa bawat susunod na kabanata. Samantala, batid ng bayan ang kaba ng dibdib ng puno ng bansa sa mga pagkilos na naganap kamakailan. At araw -araw ang paglabas ng mga pahayag hinggil sa usaping nasa harap ngunit patuloy ang usad pagong na pagpapanagot sa mga tiwali. Walang pagdududa na may kabatiran sa usapin ng katiwalian ang punong ehekutibo na nagbunsod sa pahayag. Subalit, sa bagal ng pagpapanagot na inaabangan ng bayan, ‘di mawala ang pagdududa na ‘di ganap na panagutin sa salang gawa ang mga napangalanang opisyal. O’ sadyang natatakot sa ‘di batid na hawak ng mga inakusahan na magdadawit sa punong ehekutibo o sa pamilyang may katulad na salang gawa sa bayan. O’ pagtitiyak na ‘di sasabit sa usapin sa hinaharap?

Malalim ang usapin sa hanay ng mga opisyal na ‘di mawari ni Mang Juan kung anong kalalabasan ng mga pag-uusisa ng mga sangay ng pamahalaan na inatasan. Sa totoo lang, walang paggalaw sa mga usapin higit sa mga halal na opisyal na matamang inaabangan ng bayan na mapapanagot sa salang pagnanakaw sa salaping bayan. Ang kabagalang galawan na pagpapanagot sa mga mandarambong ang nagbubunsod sa bayan na gumalaw upang gisingin o kalampagin ang pamahalaan sa pagpapanagot sa mga opisyal. Mahaba ang pasensiya ng bayan sa kakulangan ng serbisyo ngunit ang pisi ng pasensiya’y napa-ikli higit silip na ‘di napunta sa tama ang serbisyong dapat at kinurakot ng iilan na ganap ang kapal ng mga mukha. Salapi ng bayan o tax-ng ina ang nakasalang sa usapin ng katarungan na ipinahayag ng punong ehekutibo na inuupuan sa ‘di malamang kadahilanan. Muli, ipababaon ba sa limot at tatakpan ng ibang isyu na panlansi?

Ang pagpapanagot sa may sala ang ibig ng bayan ng ‘di humanap ng ibang landas na ‘di ikasisiya ng nasa puno ng Balite ng Malacanan. Batid ng bayan ang kaba sa dibdib ni Jun Singhot na ‘di mabilang na nakipagkita sa mga opisyal ng sandatahang lakas upang masiguro na ‘di babaligtad ng katapatan. O sadyang inaalo dahil sa karanasan sa nakaraan na nagpasipa sa ama tungo sa Hawaii at ‘di sa Paoay. At sa pagtitiyak ng ‘di pagtalikod sa kasalukuyang liderato ang sandatahang lakas, nariyan ang pangako ng pagpapataas ng sahod at ibang benepisyo. Ngunit ang masakit, tila nakasalang sa kawalan ang pahayag ng katiwalian na ‘di mapagalaw sa ‘di malamang dahilan. Jun Singhot, may balik ba sa sarili ang pahayag at hinihintay na mawala sa isip ng bayan ang usapin.

Sa totoo lang, payak ang ibig ng bayan, panindigan ang pahayag at pananagutin ang may sala sa bayan higit ang mga halal na opisyal na kumurakot sa salaping bayan. Walang labis o kulang ang ibig ng bayan, ang matiyak na pananagutin ang mga kurakot at ang maglalagay sa ngalan sa pedestal at masasabing iba ang anak sa ama. Mapagbigay ang bayan sa serbisyong tapat higit ang maiahon sa hirap ang mamamayan. Subalit sa takbo ng kaganapan sa bansa, kathang isip ang maiahon sa hirap ang nakararami sa uri ng mga opisyal na nasa pamahalaan. Ang pagpapanagot sa mga tiwali sa pamahalaan ang serbisyong inaasahan na magaganap sa kasalukuyan, higit ang liderato ang nagpahayag kasalukuyang usapin. Hindi iba sa bayan ang usapin ng pandarambong, ngunit ng ilabas ng puno ng pamahalaan ang nagbigay liwanag at bahagyang pag-asa sa bayan at kay Mang Juan. Ngunit, ‘di maalis ang tanong, may mapananagot ba sa katiwaliang banggit?

Jun Singhot, panahon na isantabi ang kampihan at ganap na isulong ang pagpapanagot sa mga opisyal higit ang mga halal sa salang pandarambong. Ang malaking halaga na ‘di napunta sa serbisyong bayan ang dahilan sa pagpapanagot sa mga may sala nang makita ni Mang Juan ang tunay na layong malinis ang pamahalaan. Gamitin ang nalalabing panahon sa panunungkulan sa serbisyong makatarungan para sa lahat na walang kinikilingan. Ang maganap sa bansa na ang tax ng ina mo’y nagagamit sa itinakda ng pamahalaan ang serbisyo pamantayan na magagamit sa susunod na pamahalaan. Ang magandang halimbawa sa natitirang mga taon bilang pangulo, ang isakatuparan at ang panindigan ang pahayag na pananagutin ang may sala. Ang salang ‘di magawa ang pahayag ang magpuputol sa ibig na malinis na pamahalaan.

Pangulo, bilang panghuli, panindigan ang pahayag na pananagutin ang may sala sa bayan higit ang mga tiwali na may gawa sa ‘di tanggap na pagbaha sa bansa dahil sa ‘di makitang multong proyekto. Umaasa na sa susunod na mga araw, matatangay ng baha ng katotohanan ang malalaking buwaya, pating at maging ang mga balyena sa ngalan ng katarungan para sa bayan. Walang pag-iimbot na mailalagay sa kasaysayan ang ngalan ngunit umaasa na sa tamang bahagi mapapabilang dahil sa tamang tindig na mapanagot ang mga tiwali sa pamahalaan maging sino pa man.

Maraming Salamat po!!!!