Madriaga pinayagan ng korte na dumalo sa impeachment hearing vs VP Sara

NAGLABAS ng utos ang Manila Regional Trial Court na nagpapahintulot kay Ramil Madriaga, umano’y bagman ni Vice President Sara Duterte, na dumalo sa impeachment hearing ng House Committee on Justice sa Abril 14, 2026.

Ayon sa kautusan, si Madriaga ay maaaring lumahok mula 8:00 a.m. hanggang 5:00 p.m. sa nasabing araw, kasama ang tamang jail escorts, at inatasan ang Jail Warden ng MMDJ Annex 2 na magsumite ng ulat sa loob ng limang araw matapos ang pagdinig.

Nauna nang ipinatawag ng House Committee on Justice si Madriaga upang magbigay ng testimonya kaugnay sa impeachment proceedings laban kay Duterte.

Sa kanyang affidavit na may petsang Nobyembre 29, 2025, idinetalye ni Madriaga ang umano’y paghahatid ng humigit-kumulang P33 milyon hanggang P35 milyon na nakalagay sa apat na duffel bags.

Isa umano sa mga bag ay iniwan sa parking compound ng Office of the Ombudsman.

Batay pa sa affidavit, ang mga pondo ay naihatid sa mga indibidwal na inilarawan bilang mga kaibigan at kakilala ng bise presidente.

Samantala, kinumpirma ng kampo ni Duterte na nagsumite sila ng petisyon sa Supreme Court para humiling ng final injunction na magpapawalang-bisa sa impeachment proceedings, na anila’y layong magbigay ng kalinawan at hindi upang iwasan ang proseso.

Ang pagdalo ni Madriaga sa impeachment hearing ay inaasahang magiging mahalagang bahagi ng pagtalakay ng komite sa mga alegasyon laban kay Vice President Duterte, at magbibigay ng konkretong ebidensya sa gitna ng mai-nit na usapin sa politika.