Ang sabi sa survey: PUBLIKO BILIB SA KAMARA!

NANATILING mataas ang antas ng kasiyahan ng publiko sa mga miyembro ng House of Representatives, kungsaan humigit-kumulang pito sa bawat sampung Pilipino ang nagpahayag ng kanilang pag-apruba sa kanilang district representatives, ayon kay Jay Khonghun, batay sa pinakabagong nationwide survey ng WR Numero Research.

Ayon kay Khonghun, ipinakita ng resulta ng March 2026 ‘Philippine Public Opinion Monitor’ na 71 porsiyento ng mga respondent ang nagsabing sila ay nasiyahan sa performance ng kanilang lokal na kinatawan, patunay ng tuloy-tuloy na suporta ng publiko sa grassroots level.

Ipinakita rin sa parehong survey na ang Kamara, sa pamumuno nina Faustino “Bojie” G. Dy III at Ferdinand Alexander “Sandro” A. Marcos, ay nakakuha ng 35 porsiyentong “mahusay” na rating, kasabay ng 30 porsiyentong undecided at 35 porsiyentong dissatisfied, ayon pa kay Khonghun.

Halos katulad ang mga bilang na ito sa Senado, na nagpapakita ng magkakatulad na pananaw ng publiko sa dalawang kapulungan ng Kongreso.

Isinagawa ang survey sa pamamagitan ng face-to-face interviews sa 1,455 adult Filipinos mula Marso 10 hanggang 17, na may margin of error na ±3 porsiyento sa 95 porsiyentong confidence level.

Ayon sa mga lider ng Kamara, mas sumasalamin ang mataas na satisfaction rating sa district level sa tunay na performance ng mga mambabatas, dahil ito ay batay sa direktang karanasan ng mga nasasakupan.

“Ang 71 porsiyentong satisfaction rating ay nagpapakita na, lampas sa pambansang pananaw, nararamdaman ng ating mga kababayan ang presensya at serbisyo ng kanilang mga kinatawan sa araw-araw,” ani Khonghun.

Ayon naman sa mga analyst, ang institutional ratings ng Kongreso ay madalas naaapektuhan ng mas malalaking isyung pulitikal sa bansa, habang ang district-level satisfaction ay mas nakatuon sa aktuwal na serbisyo tulad ng medical at financial assistance, imprastraktura, at mga programang pangkomunidad.

Ipinakita rin ng survey na 30 porsiyento ng mga respondent ang nananatiling undecided sa kabuuang performance ng Kamara, isang indikasyon na may bahagi ng populasyon na patuloy pang bumubuo ng kanilang pananaw sa gitna ng iba’t ibang naratibo sa pambansang diskurso.

Sa kabila ng halos pantay na hati ng positibo at negatibong rating sa institutional level, iginiit ni Khonghun na ang mataas na satisfaction sa district level ay nagpapatibay sa kanilang pokus sa paghahatid ng serbisyo at paggawa ng batas.

“Malinaw ang mensahe: pinahahalagahan ng mga tao ang mga resulta na kanilang nakikita at nara-ramdaman sa kanilang komunidad,” dagdag niya.

Kamakailan, binigyang-diin ng Kamara ang mga hakbang nito sa pagpasa ng mahahalagang batas, pagpapalakas ng oversight functions, at pagsuporta sa mga programang tumutugon sa inflation, gastos sa enerhiya, at social protection—mga isyung direktang nakaaapekto sa mga pamilyang Pilipino, ayon kay Khonghun.

Isang independent polling firm ang WR Numero Research na nagsasagawa ng regular na survey upang masukat ang opinyon ng publiko hinggil sa pamamahala at pambansang isyu.