DOJ kinumpirma may aplikasyon na para sa Interpol Red Notice kay Dela Rosa

INIHAYAG ng Department of Justice (DOJ) na may aplikasyon na para sa Interpol Red Notice kay Senador Ronald ‘Bato’ Dela Rosa.

Ayon sa DOJ, ipinaaaresto na si Dela Rosa sa National Bureau of Investigation (NBI) at Philippine National Police (PNP) matapos walang ilabas na temporary restraining order sa arrest warrant mula sa International Criminal Court (ICC).

Sinabi ni DOJ Spokesperson Atty. Polo Martinez, sa pagkakaalam niya ay may aplikasyon na para sa red notice laban sa senador.

Hindi kasi aniya pwedeng maglabas ng Hold Departure Order laban kay Dela Rosa dahil kakailanganin nitong magmula sa isang korte.

Ani Martinez, sa ngayon ay wala namang namonitor na paglabas ng bansa ni Dela Rosa batay sa impormasyon mula sa Bureau of Immigration (BI).

Noong nakaraang linggo nang ianunsiyo ni DOJ Secretary Eric Vida na nasa ilalim ng Immigration Lookout Bulletin Order na si Dela Rosa.