ROMUALDEZ IKUKULONG SA PAYATAS JAIL; ‘DI KAILANGAN NG HOSPITAL ARREST

INIUTOS ng Sandiganbayan Third Division nitong Lunes ang paglilipat kay dating House Speaker Martin Romualdez mula Philippine General Hospital (PGH) patungo sa New Quezon City Jail sa Payatas.

Inanunsyo ni Associate Justice Karl Miranda ang kautusan matapos iharap sa korte ang resulta ng independent medical evaluation ng PGH.

Nauna nang sinabi ni PGH Medical Director, Dr. Gerardo Legaspi, na maaari nang ma-discharge si Romualdez “at any time”, at hindi medically required ang patuloy nitong hospital confinement dahil mababa ang panganib niya sa agarang heart attack.

Batay sa pagsusuri ng PGH, mababa ang risk ni Romualdez para sa impending heart attack at hindi kinakailangan ang continued inpatient confinement para sa kanyang cardiac condition.

Dinala si Romualdez sa PGH mula Cardinal Santos Medical Center para sa independent medical assessment na iniutos ng Sandiganbayan matapos siyang maaresto kaugnay ng kasong plunder.

Nauna nang sinabi ng kanyang mga doktor sa Cardinal Santos na mayroon siyang ilang kondisyon kabilang ang hypertensive atherosclerotic cardiovascular disease, unstable angina, coronary artery disease, diabetes at hypertension.

Nauna nang naglabas ang Sandiganbayan ng commitment order para sa pagkakadetine ni Romualdez sa New Quezon City Jail, ngunit pansamantala siyang nanatili sa ospital habang dinidinig ang kanyang kahilingan na manatili sa medical confinement.

Nahaharap si Romualdez sa kasong plunder kaugnay ng umano’y P7.44-bilyong kickbacks sa flood control projects. (Boy Celario)