PBBM papangalanan ang bagong Chief Justice ngayong linggo

NAKATAKDANG pangalanan ni Pangulong Ferdinand Marcos Jr. ang bagong punong mahistrado ng Korte Suprema (SC) ngayong linggo, na hahalili kay outgoing Chief Justice Alexander Gesmundo, sinabi ng Malacañang nitong Miyerkules.

Ayon kay Palace Press Officer Undersecretary Claire Castro sa press briefing sa Malakanyang, ang bawat kandidato ng punong mahistrado ng SC ay may kanya-kanyang kakayahan at integridad, at iaanunsyo ni Pangulong Ferdinand Marcos Jr. ang susunod na punong mahistrado ngayong linggo.

Noong Oktubre, isinumite ng Judicial and Bar Council kay Pangulong Marcos ang shortlist nito ng mga nominado para sa posisyon ng SC chief justice at associate justice.

Batay sa liham na nilagdaan ni Chief Justice Alexander Gesmundo, limang indibidwal ang kasama sa shortlist ng JBC, na sina: Associate Justice Alfredo Benjamin Caguioa, Associate Justice Japar Dimaampao, Senior Associate Justice Marvic Leonen, Associate Justice Midas Marquez, Associate Justice Rodil Zalameda.

Samantala, kasama sa shortlist ng JBC para sa associate justice ay sina: Court of Appeals (CA) Associate Justice Ramon Bato Jr., Solicitor General Darlene Marie Berberabe, Commission on Audit Chairperson Gamaliel Cordoba, CA Associate Justice Ramon Cruz, CA Associate Justice Maria Elisa Sempio Diy, CA Associate Justice Myra Garcia-Fernandez, CA Presiding Justice Fernanda Lampas Peralta, Commission on Elections Commissioner Ernesto Maceda Jr., CA Justice Ronaldo Roberto Martin, CA Justice Walter Ong, Court of Tax Appeals Associate Justice Maria Rowena San Pedro. (Vanz Fernandez)