‘NO LOCKDOWN’ SA NCR, STRICT GCQ LANG!

POSIBLE pang mabago ang quarantine classification sa Metro Manila depende sa magiging apela ng mga local government units.

Ito ay matapos na palawigin ni Pangulong Rodrigo Duterte ang General Community Quarantine (GCQ) With Heightened Restriction sa Metro Manila hanggang Agosto 15.

Nauna nang sinabi ni MMDA Chairman Benhur Abalos na nagkasundo ang mga Metro Mayors na isailalim ang buong National Capital sa Region (NCR) sa dalawang linggo na Enhanced Community Quarantine (ECQ) sa kundisyon na magbibigay ng cash aid ang pamahalaan at bibigyan sila ng 4 milyon na vaccine.

Ayon kay Health Secretary Francisco Duque, kapag umapela ang LGUs ay pag-aaralan muli ng Inter Agency Task Force on Emerging Infectious Diseases (IATF) ang mga datos at metrics.

“Locking down is easy but you need to identify the social amelioration funds, for example, “We are getting more data, more information as to, for example, the availability of social amelioration budget,” ani Duque.

Sakaling mabago umano ang quarantine classification sa Metro Manila ay posible itong ipatupad sa Agosto 1, 7 o 15.

Magsasagawa umano ng re-computation ang DOH upang matiyak na nadadagdagan ang vaccine na ipapamahagi sa Metro Manila kung saan may local transmission ng Covid Delta variant.

Kaugnay nito, isinailalim din sa GCQ with heightened restrictions ang lalawigan ng Ilocos Sur, Cagayan, Bulacan, Laguna, Lucena City, Cavite, Rizal, Naga City, Antique, Aklan, Bacolod City, Capiz, Negros Oriental, Zamboanga Del Sur, Misamis Oriental, Davao City, Davao Del Norte, Davao De Oro, Davao Occidental, at Butuan City.

Maliban dito ay isinailalim din sa GCQ ang Baguio City, Apayao, Santiago City, Isabela, Nueva Vizcaya, Quirino, Quezon, Batangas, Puerto Princesa, Guimaras, Negros Occidental, Zamboanga Sibugay, City Of Zamboanga, Zamboanga Del Norte, Davao Oriental, Davao Del Sur, General Santos City, Sultan Kudarat, Sarangani, North Cotabato, South Cotabato, Agusan Del Norte, Surigao Del Norte, Agusan Del Sur, Dinagat Islands, Surigao Del Sur, at Cotabato City mula Agosto 1 hanggang 31.

Gayundin ay mananatili naman mula Agosto 1-7 sa Enhanced Community Quarantine (ECQ) ang Iloilo City at Iloilo Province, at Cagayan De Oro City at Gingoog City.
Habang Modified Enhanced Community Quarantine (MECQ) naman ang Ilocos Norte, Bataan, Lapu-Lapu City at Mandaue City mula Agosto 1 hanggang Agosto 15,.

Isasailalim ang mga nalalabing bahagi naman ng bansa sa Modified GCQ mula Agosto 1 hanggang 31. (Jonah Mallari/Vanz Fernandez/Josephine Patricio)