Pichay pinapa-disqualify sa Comelec

PINAKAKANSELA sa Commission on Election (Comelec) ang muling pagtakbo ni Surigao Del Sur 1st District Rep. Prospero Pichay, Jr., dahil sa kawalan na umano nito ng kuwalipikasyon para humawak ng anumang posisyon sa public office.

Sa petisyon ni Construction Worker’s Solidarity (CWS) party-list Representative Romeo Momo, giniit nito na dapat na kanselahin ang certificate of candidacy (COC) ni Pichay.

Aniya, wala nang karapatan si Pichay na humawak ng anumang posisyon sa pamahalaan dahil pinagtibay na ng Court of Appeals noong 2013 ang desisyon ng Ombudsman na guilty si Pichay para sa grave misconduct na may kaparusahang Dismissal from the government service at may kasamang perpetual disqualification to hold public office o habambuhay na diskuwalipikasyon sa pag hawak ng anumang public office.

Batay pa sa petisyon ni Momo, sinadya ni Pichay na ideklara na eligible ito sa pagtakbo para sa public office at sumagot na ‘no’ para sa tanong na ‘have you ever been found liable for an offense which carries with it the accessory penalty of perpetual disqualification to hold public office, which has become final and executory?’

“Fully aware of the concurrence of respondent Pichay, Jr.’s false representation pertaining to a material matter which refers to his qualifications for elective office, of his deliberate attempt to mislead, misinform, or hide a fact which would otherwise render him eligible and of his intention to deceive the electorate as to his qualifications for public office,” ayon sa petisyon na hinain ni Momo.

Binasura rin ng Ombudsman ang mosyon ni Pichay na baligtarin nito ang pinataw sa kanyang guilty verdict sa kaso. Wala umanong nakitang rason ang Ombudsman para pagbigyan ang motion for reconsideration ng mambabatas.

Ayon pa sa petisyon ni Momo, giniit nitong i-disqualify na ang pagtakbo ni Pichay sa eleksyon 2022. Sinaad din nito ang dokumento na nagkukumpirmang kasama si Pichay sa mga umano’y listahan ng perpetually disqualified na maupo sa public office o muling magserbisyo sa gobeyerno.

“That subsequently, the Honorable Commission issued COMELEC Document No. 17-0108 (LAW 16-04243) confirming that in its 09 December 2015 letter to Atty. Wendell Ian C. Perez, Graft Investigation and Prosecution Officer II, that the name of respondent Pichay, Jr. , among others, was entered in the database/list of those who are perpetually disqualified to hold public office/reemployment in the government service for purposes of subsequent elections,” paglalahad nito.

Matatandaan na hinatulang guilty si Pichay, na dating chairman ng Local Water Utilities Administration, at dalawa pang tauhan nito sa anomalya na paglalabas ng 780 million pesos ng pera ng LWUA para bumili ng 60% share ng isang local thrift bank – ang Express Savings Bank Inc. nuong 2009. Itinuloy ni Pichay ang pagbili ng naluluging banko kahit na tutol dito ang Department of Finance at pati na ang Office of the Solicitor General.

Base sa Ombudsman rules at sa mga desisyon ng Supreme Court, ang desisyon ng Ombudsman ay immediately executory even pending appeal kaya dapat ay ipatupad ng COMELEC as a Constitutional Body ang desisyon ng Ombudsman na hindi na maaaring humawak ng posisyon sa gobyerno si Pichay. (Mylene Alfonso)