Accuracy ng random manual audit para sa 2022 polls, 99.9% parin – Comelec

NASA 99.9% pa rin ang accuracy rate ng random manual audit (RMA) na isinasagawa para sa May 9 national and local elections.

Sa isang pulong balitaan nitong Martes, sinabi ni Commission on Elections (Comelec) acting spokesperson Rex Laudiangco na hanggang alas-4:00 ng hapon ng Mayo 23, nasa 163 na mula sa kabuuang 757 randomly selected clustered polling precincts ang natapos nang i-audit.

Ang pagsasagawa ng RMA ay pinangungunahan ng Comelec, mga poll watchdogs gaya ng LENTE, samahan ng mga certified public accountants, at ng Philippine Statistics Authority (PSA).

Sa ilalim ng RMA, inaalam ang performance ng mga vote counting machines (VCMs) at sinusuri ang mga balota upang ma-validate ang accuracy ng mga ito.

Sinabi ni Laudiangco na base naman sa hiwalay na audit ng poll watchdog na Parish Pastoral Council for Responsible Voting (PPCRV), 77,786 ng 78,894 nakolektang election returns (ERs) ang nakitaan ng 100% accuracy rate habang bina-validate pa aniya ang assessment sa 339 pang ERs. (Andi Garcia)