8 nag-iimbak ng mapanganib na kemikal, kulong

Arestado ang walong katao ng National Bureau of Investigation (NBI) sa pag-iimbak ng mapanganib na sangkap nang walang kaukulang permit o clearance mula sa Department of Environment and Natural Resources (DENR).
Kinilala ni NBI officer-in-charge Eric B. Distor ang mga naaresto na sina Patrick Edwardson Malibiran, Renato de Pablo, Eddie Ramoso, Josephine Pauso, Julius Villacastin, Federico Cortez, Eliseo Amar at Aldwin Calano.
Ayon kay Distor, nag-ugat ang operasyon sa intelligence report na natanggap ng NBI-Environmental Crime Division na ang 88 Golden Place Smelting Inc., nagsasagawa ng gold smelting/refinery sa Bulacan.
Nang iberipika ng NBI-EnCD sa DENR-Environmental Management Bureau, lumalabas na walang ECC o Certificate of Non-Coverage (CNC) ang kompanya at wala ring permit to operate, wastewater discharge permit at hazardous waste registration ID .
Isinalang sa Inquest proceedings sa Meycauayan Prosecutor’s Office para sa paglabag sa “Toxic Substances and Hazardous and Nuclear Waste Control Act of 1990 ang mga inaresto. (Jocelyn Domenden)