Kandidatong bise alkalde huli sa gun ban

LAOAG CITY – Kinumpirma ng Commission on Elections (Comelec) na kakandidatong para bise alkalde ang isa sa mga nahuli sa Comelec checkpoint sa bayan ng Badoc sa Laoag city ng Ilocos Norte nang matuklasan ng mga otoridad na may 14 na bala ng cal 40 na baril sa kanyang sasakyan.

Kinilala ni Police Major Edward Santos, ang chief of police sa bayan ng Badoc ang mga nahuli na sina Jorcon Victor Sales y Paz, 37 anyos, walang asawa, negosyante, residente sa Brgy. 1 Sta. Rita sa bayan ng Bacarra, driver ng isang ford raptor; at kasama nito na si Vincent Dancel, 23, at residente ng Brgy. 20 San Miguel dito sa Lungsod ng Laoag.

Napag-alaman na tatakbo si Sales para bise alkalde sa bayan ng Bacarra.

Ayon kay Santos, patungo sana sa La Union ang dalawa subali’t habang iniinspeksyon ng mga pulis ang kanilang sasakyan kung saan hinanap nila ang OR at CR sa driver sa Comelec checkpoint, binuksan ni Sales ang kahon ng armscor at dito na tumambad ang mga bala ng nasabing baril.

Iginiit ni Sales na hindi niya alam na may mga bala sa sasakyan at sinabi na hiniram lamang niya ito.

Sa ngayon, nanatili sa kustodya ng PNP sa bayan ng Badoc sina Sales at Dancel habang inihahanda na ang reklamong paglabag sa Republic Act (RA) 10591 o “Comprehensive Firearms and Ammunition Regulation Act” at comelec gun ban laban sa kanila.