Bebot hinoldap, hinubaran, at pinaso pa

Hinoldap, hinubaran at pinaso ng sigarilyo ng mga hindi pa nakikilalang salarin ang isang babae sa Magsaysay, Davao del Sur.

Dumulog sa pulisya ang 25 anyos na biktima para isumbong ang nangyaring krimen sa kaniya malapit sa ilog sa Barangay Barayong noong Biyernes.

Ayon sa ulat, naglalakad ang biktima para kumuha ng koleksiyon sa negosyong buy-and-sell rice nang bigla siyang lapitan ng 3 lalaki.

Bigla umanong hinablot ang kaniyang backpack na may lamang nasa P50,000. Hinubad din umano ng mga salarin ang pang-itaas na damit ng biktima at pinaso ng sigarilyo ang katawan.

Agad tumakas umano ang mga salarin habang humingi ng saklolo ang biktima sa mga residente sa lugar.

Patuloy ang pagtugis ng mga awtoridad sa mga salarin.