Hustisya nakamit ng pamilya ng Dipaculao vice mayor Narciso Amansec

MAKARAAN ang halos isang taon na pagluluksa at paglalaban sa pagpaslang ng kanilang magulang, nakamit din sa wakas ng pamilya ng pinaslang na Dipaculao, Aurora vice mayor Narciso Amansec ang hustisya, tinuldukan ng Commission on Elections (Comelec) ang desisyon nito na tanggalin sa pwesto si Aurora Vice Governor Gerardo Noveras.

Sa inilabas na resolusyon nitong Huwebes, dinenay ng Comelec en banc ang ‘motion for reconsideration’ na hinain ng kampo ni Noveras.

Hindi nakaharap si Amansec sa preliminary hearing ng Comelec noong Nobyembre 2022 na kung tutuusin ay maaring nagresulta agad sa pagdikwalipika ng kanyang petition, subalit nagpasya ang komisyon na maglabas parin ng kanilang desisyon na naka-base sa merits ng kaso dahil hindi maaaring isantabi lamang ang mga kaso ng matinding paglabag sa batas eleksyon ng bansa dahil lamang sa isang technicality.

“However, strict adherence to procedural rules should not operate to shackle the Commission’s efforts to deter and punish the egregious disregard of prohibitions under our substantive electoral laws,” saad ng Comelec sa kanilang desisyon.

“As to the material allegation that Noveras committed acts in violation of Section 261(e) of the Omnibus Election Code, the COMELEC en banc ruled that he can be disqualified pursuant to Section 68 thereof for the commission of a fraudulent scheme in indirectly compelling Mr. Tecuico to perform acts beyond the scope of his work in furtherance of his candidacy,” diin pa ng Comelec.

Kung matatandaan, April 26, 2022 nang kasuhan ni Amansec si Noveras sa Comelec dahil sa paggamit ng kanyang posisyon bilang Gobernador ng Aurora para magamit ang mga pasilidad at kagamitan ng probinsya para sa kanyang kampanya bilang vice governor sa 2022 national and local elections (NLE).

Tumakbo bilang kandidato para vice governor si Amansec sa 2022 NLE laban kay Noveras na tapos na ang termino bilang gobernador.

Si Amansec mismo ang nakakita ng pag-imprenta ng mga tarpaulin at iba pang campaign materials ni Noveras sa loob ng Aurora Training Center compound.

Sa unang desisyon na nilabas ng Comelec sa kaso ni Noveras, nakakita sila ng sapat na ebidensya para mapatunayan na ginamit ni Noveras ang kanyang posisyon bilang Gobernador ng Aurora para gamitin ang pondo ng probinsya para sa kanyang kandidatura sa 2022 NLE.

Ilang buwan matapos ng kanyang paghain ng kaso laban kay Noveras ay pinaslang si Amansec, ang kanyang asawang si Merlina, at kanilang driver sa loob ng kanilang sinasakyang pick-up sa Barangay Dibatunan.

Sinabi ng Comelec na pinuwersa ni Noveras ang mga tauhan niya sa probinsya para mag-imprenta ng kanyang campaign materials na labag sa batas eleksyon ng Pilipinas.