3rd petition vs P125m secret funds ni VP Sara isasampa ngayon sa Korte Suprema

SUMALI na ang Makabayan bloc at hiniling sa Korte Suprema na ideklara ang P125-million confidential expenses ni Vice President Sara Duterte noong 2022 bilang unconstitutional.

Ang mga kasalukuyan at dating mambabatas ng progressive bloc ay magsasampa ng petition ngayong Lunes sa kataas-taasahang hukuman para atasan si Duterte na ibalik ang pondo na kanyang ginastos sa national treasury.

Ang kasalukuyang grupo ng Makabayan lawmakers ay sasama sa mga dating kinatawan ng Bayan Muna party list, kabilang ang chairman nito na si Neri Colmenares, at mga dating kinatawan na sina Carlos Isagani Zarate, Ferdinand Gaite at Eufemia Cullamat.

“There’s strong legal basis to challenge the constitutionality of confidential funds. The vice president had no expressly provided authority to use it,” sabi ni Gabriela Rep. Arlene Brosas.

Sa isang online press briefing noong Biyernes, inihayag ng Makabayan bloc ang kanilang kagustuhang magsampa ng ikatlong petition laban sa 2022 confidential expenses ni Duterte sa Korte Suprema.

Sinabi ni ACT Teachers Rep. France Castro na hihilingin nila sa kataas-taasang hukuman na ideklarang unconstitutional ang 2022 confidential funds ng bise presidente dahil wala itong line item sa 2022 national budget.

“Our prayer in the petition is one, for this P125 million expense to be declared unconstitutional and two, for this to be returned to the national treasury. We also want the officials involved to be accountable,” diin ni Castro, ang House deputy minority leader.

Ang hakbang ay ginawa ng Makabayan ilang araw matapos atasan ng Supreme Court en banc si Duterte, Executive Secretary Lucas Bersamin, at Budget Secretary Amenah Pangandaman na magkomento sa petitions kontra sa P125 million transfer mula sa contingency fund tungo sa confidential ng Office of the Vice President noong 2022.

Ang naunang dalawang petitions sa Korte Suprema ay iginigiit na ideklara ang naturang confidential fund bilang unconstitutional.

Ang una ay isinampa Nov. 7, 2023 ng mga legal at economic expert, kabilang si dating Commission on Elections chair Augusto Lagman, constitutionalist Christian Monsod, dating finance undersecretary Maria Cielo Magno, at abogadong si Ibarra Gutierrez III.

Ang ikalawang petition ay isinampa Nov. 15, 2023 ni dating Supreme Court Senior Associate Justice Antonio Carpio, abogadong si Manuel “Chel” Diokno, at dating Senador Richard Gordon.