Truck nahulog sa bangin: 1 patay, 1 grabe

NASAWI ang driver at malubhang nasugatan ang pahinante nito nang mahulog sa bangin ang sinasakyan nilang crane truck sa Pagbilao, Quezon noong Miyerkoles.

Ayon sa report ng Pagbilao Police, nasawi sa pagkakaipit sa loob ng truck ang driver na si Jeffrey Bario Mandia, 37 anyos, ng Karuhatan, Valenzuela City; habang ginagamot sa ospital ang pahinanteng si Aljhov Aranas, 28, taga-Padilla, Cebu City.

Binabagtas ng mga biktima ang pababang bahagi ng matarik na Pagbilao-Atimonan diversion road sa Sitio Upper Sapinit, Barangay Malicboy patungo sa Pagbilao nang mawalan ng preno ang sasakyan 7:30 ng gabi. Sumampa ang truck sa road shoulder at bumangga sa puno ng niyog at kubo sa gilid ng kalsada bago nahulog at bumaligtad sa 8-metrong lalim na bangin.

Naipit ang dalawa sa loob ng truck at pinagtulungan sagipin ng mga tauhan ng Pagbilao Provincial Disaster Risk Reduction and Management Office (PDRRMO), Municipal Disaster Risk Reduction and Management Office (MDRRMO) at mga tanod sa lugar.

Dinala ang dalawang biktima sa ospital pero idineklarang dead on arrival ang driver.