Lalaki niratrat-patay sa Bacolod

Nasawi sa pamamaril ang isang lalaki sa Purok Lampirong, Brgy. 2, Bacolod City noong Linggo ng umaga.

Sinabi ni Police Major Eugene Tolentino, hepe ng Police Station 2, na naglalakad ang biktima nang dumating ang isang lalaking nagmamaneho ng motorsiklo. Tumakbo ang biktima ngunit hinabol ito ng salarin at pinagbabaril.

Tumakas naman kaagad ang gunman.

Sinabi ni Tolentino na nagtamo ang biktima ng apat na tama ng bala at idineklarang patay sa isang ospital.

Dagdag pa nito,  inaresto ang biktima dahil sa ilegal na sugal at hinihinalang sangkot sa insidente ng pagnanakaw sa Brgy. 2.

Patuloy pa ang imbestigasyon sa nasabing insidente.