PASAHERO GINILITAN NG TAXI DRIVER

Sinaksak sa leeg at napatay ng hindi pa nakikilalang taxi driver ang 25-anyos na pasahero sa Barangay Pasong Putik, Quezon City noong Sabado nang madaling araw.

Kinilala ang biktima na si Isidro Amante Gonzales Jr., binata at residente sa A1 Shekel St., Phase 8, Brgy. North Fairview, Quezon City.

Sa report ng Criminal Investigation and Detection Unit ng Quezon City Police District (CIDU- QCPD), 3:30 ng madaling araw ng mangyari ang insidente malapit sa Uncle John Convenience Store sa Quirino Highway, Brgy. Pasong Putik, sa lungsod.

Batay sa imbestigasyon ni P/SSg Erwin Jay Mendez, nasa loob ng kanilang pampasaherong bus ang mga saksing sina alyas Benvienido, konduktor at ang driver na si Alvin, sa Quirino Highway sa kanto ng Maligaya Drive nang lapitan sila ng duguang biktima.

At bigla itong nawalan ng malay at bumagsak sa lupa.

Agad namang nagresponde ang mga operatiba ng QCPD Pasong Putik Proper Police Station 16 na pinamumunuan ni P/Lt. Rommel Tiangco at isinugod ang biktima sa Tala Hospital sa Caloocan City.

Idineklara dead on arrival ang biktima 4:17 ng umaga ni Dr Zephaniah Alvin S Gimelo sanhi ng tinamong malalim na saksak sa leeg.

Batay sa kuha ng CCTV, nakita ang biktima na nakikipagtalo sa hindi pa nakikilalang driver ng taxi na may plakang UVH 964 malapit sa Uncle John Convenience Store 3:20 ng madaling araw.

Sa kalagitnaan ng pagtatalo, biglang sinaksak ng driver sa leeg ang biktima saka mabilis na sumakay sa taxi at tumakas.

May hinala ang pulisya na nagtalo ang dalawa sa pamasahe na siyang dahilan ng krimen pero patuloy pa ang imbestigasyon habang tinutugis ang nakatakas na taxi driver.