Retiradong US navy, arestado sa NAIA 3 sa pagdadala ng 2 airgun
Advertisers
Isang papaalis na pasahero ang inaresto ng Philippine National Police Aviation Security Group (PNP-AVSEGROUP) sa NAIA Terminal 3 dahil sa paglabag nito sa Omnibus Election Code kaugnay ng COMELEC Gun Ban.
Nakatakdang sumakay sa domestic flight ang 66-anyos na lalaking pasahero, isang umanong retiradong U.S. Navy serviceman at residente ng Taguig City, nang siya ay i-flag down ng mga tauhan ng screening sa paliparan dahil ipinakita ang larawang kahawig ng baril sa X-ray screening ng kanyang balikbayan box.
Kasunod nito, nagsagawa sila ng manu-manong inspeksyon at natagpuan ang dalawang airgun na walang kinauukulang mga dokumento. Ang pagmamay-ari at pagdadala ng mga baril o mga katulad na armas nang walang pahintulot sa panahon ng halalan ay ipinagbabawal.
Agad naman inaresto ng mga tauhan ng PNP-AVSEGROUP ang nasabing pasahero at ipinaalam sa kanya ang kanyang mga karapatan ayon sa konstitusyon. Ang pag-aresto ay naitala gamit ang Alternative Recording Device (ARD), bilang pagsunod sa mga alintuntunin ng Korte Suprema.
Muli naman nagpaalala si PNP-AVSEGROUP Director PBGen Christopher M. Abecia sa publiko na nananatiling may bisa pa ang COMELEC gun ban hanggang Hunyo 11. “Ang hawig o replica ng isang tunay na baril ay ipinagbabawal din. Ang mga lumalabag ay huhulihin at kakasuhan. ” saad nito. (JERRY S. TAN/JOJO SADIWA)