UMAMIN, IBALIK, MAGBITIW

Dumarami ang likas na pangyayari na nakakapinsala sa sambayanan higit sa buhay at kabuhayan ng mamamayan. Ang ‘di inaasahang kaganapan tulad ng lindol sa kaBisayaan at ang pagputok ng bulkan Taal na lubhang nakakatakot na tila delubyo sa bansa na sinimulan ng mga pagpasok ng bagyo. Walang magawa si Mang Juan kung hindi ang magkubli o lumikas ng ‘di tuwirang mapinsala ng likas na pangyayari. Magagawang maghanda sa ilang likas na kaganapan, ngunit ‘di sa lahat higit kung biglaan at ‘di inaasahan. Ang paglayo o iwas sa likas na kaganapan tulad ng lindol ang tamang galaw ng mabawasan ang pinsala. Ang biglaang paglindol o pagputok ng bulkan ay isa bang palatandaan o senyales na sinisingil ang Pinoy sa mga salang gawa. Ang masakit sa dibdib, ang karaniwang tao na tulad ni Mang Juan ang tinatamaan o pumapasan ng sakit gayung ganap ang kasalatan sa lahat ng bagay sa buhay.

Tunay na walang makakasagka sa likas na kaganapan sa dahilang ‘di batid ang dating, ang uri at kung saan darating. At tila, pagmumulat ang ibig ng sanlumikha sa tao na kailangang ingatan ang kalikasan higit ang kapaligiran ng ‘di mawala sa kinabukasan. Masakit ang pahiwatig ng kalikasan na kailangang pag-isipan ng mabawasan ang pagkasira ng kapaligiran na likha ng tao ng matiyak ang pakinabang sa kinabukasan, higit ng ating salinlahi. Ang iwasan na masira ang kalikasan at kapaligiran ang tungkulin na dapat na isa-puso ng tao higit ng mga namumuno. Ang tamang paggamit ng inatang sa balikat na bawat mamamayan ang gawing sangkalan sa paggawa ng mabuti para sa kagalingan ng bayan. Ang makitang ‘di ganap na napinsala ang kapaligiran ang premyong aanihin ng ating salinlahi sa kinabukasan.

Sa totoo lang, malaki ang ambag na magagawa ng tapat na pamunuan higit sa mabilisang paggalaw sa pangangailangan ng mga nasalanta. At ang salang gawa ng mga pinunong bayan na una ang sarili ang tuwirang sisira sa kapaligiran. Ang masakit na mabatid ang pagkakaiba kuno ng gawain ng mga lider ng bayan ayon sa gagampanan na nakasaad sa talaan. Hahayaan ang tama o ibang sangay sa pagharap sa usapin na sa harap ng bayan dahil sa hatian ng gawain. Samantala kapag halalan, walang habas kung lapitan ng mga nagpapahalal si Mang Juan na patunay na pakinabang lang ang ibig at ‘di maserbisyuhan. Sa halalan nag-uunahan, sa sakuna may hatian ng gawain at sa nakawan nagpapalakihan, ang kapal ng mukha niyo.

Masakit tanggapin na ang serbisyong inuusal sa bayan ay ganap na serbisyong laway at mapapanghawakan higit sa panahon ng pangangailangan. Salamat sa likas na kaganapan at nahubaran ng maskara ang maraming kinatawan na pansarili ang layon at ‘di serbisyong bayan. Ang mga multong proyekto ang tunay na kumitil sa maraming buhay ang galawang ‘di maikakaila ng mga sakim na kinatawan na inilabas ng kalikasan. At kaliwa’t kanan ang pagtanggi sa mga kabulastugan ng korapsyon kahit ang mismong mga nag-abot ang nagsasabi sa kung sino ang inabutan ng perang magliligtas sa mamamayan sa hagupit ng kalikasan. Maawa kayo kay Mang Juan, umamin sa pagkakamali ng gumaan ang pasanin at bigat ng kalooban. At sa huli, baka malimutan ng bayan at muling mahalal at muling magnakaw.

Sa totoo lang, batid ng bayan ang mga salang gawa ng mga kinatawang bayan at patuloy na takipan maging ang batuhan ng putik ng mga kapulungan. Ang pagganap sa gawain ayon sa nakasaad ang galawan ibig ipabatid ng mga mambabatas at ang tinatayuan kahit sa panahon na kailangan ng bayan ang pagkalinga. Ang hinahanap na kalinga ang ‘di nadadama sa mga mambabatas dahil sa hatian kuno ng trabaho. Habang ang paglalatag sa pondo sa mga ibig na proyekto binibigyan ng panahon higit kung silip ang ganap na pakinabang. At kung may nagagawa o naititirik na proyekto, umasa na ‘di sapat ang husay at kapos sa kagalingan. Mapalad ang lugar kung may masilip na naitirik o naitayo dahil karaniwan na imahinasyon lang ang proyekto o isang multo. Sa ibig na proyekto ng mga kinatawan bayan, karaniwan ang brasuhan ngunit ‘di makita ang anino sa panahon na kailangan ng kalinga galing sa kinatawan bayan. Masipag kuno sa pagsilip sa proyektong gawa sa imahinasyon o isang multo.