Pag-impound ng e-trike, e-bike sinuspinde ng LTO

SINUSPINDE muna ng Land Transportation Office (LTO) ang pag-i-impound ng e-bike, e-trike, at iba pang light electric vehicles na mahuhuling dadaan sa national roads ngayong Lunes, Disyembre 1.

Sinabi ni LTO Chief Asec. Markus Lacanilao na magsisimula ang “strict enforcement” ng paghuli at pag-impound ng e-vehicles sa national highways sa Enero 2, 2026.

Paliwanag ni Lacanilao, magkakasa sila ng malawakang information drive para maunawaan at makasunod ang publiko sa regulasyon sa e-vehicles.

“Iisa lang ang layunin ng LTO, hindi upang pahirapan ang publiko kundi upang matiyak na ang ating mga kalsada ay ligtas, maayos, at may malinaw na pananagutan ng bawat gumagamit nito.”