PNP naghahanda sa pag-aresto kay Sarah Discaya, iba pa sa flood control scam sa Davao Occ.

IPINADALA na ng Philippine National Police (PNP) ang intelligence at tracker teams para hanapin ang may-ari ng St. Timothy Construction na si Sarah Discaya at iba pang sangkot sa “ghost” flood control project sa Davao Occidental.

Sinabi ni PNP Chief, Lt. General Jose Melencio Nartatez, Jr. na nakikipag-ugnayan narin ang pulisya sa ibang ahensya habang naghahanda para sa pagpapalabas ng warrant of arrest laban sa mga suspek.

Kasama rin sa paghahanda ang pagkolekta ng impormasyon kung saan maaaring itago ang mga suspek.

Inalerto rin ang barangay at neighborhood watch groups para mag-ulat ng mga mahahalagang impormasyon. Hinihikayat ni Nartatez ang publiko na makipagtulungan sa pangangasiwa upang masiguro ang pananagutan at proteksyon ng pangkalahatang pondo.

Noong Biyernes, nagsampa ang Ombudsman ng graft at malversation cases laban kay Discaya, mga opisyal ng public works, at iba pa, kaugnay ng ?96.5 milyon na “ghost” flood control project.

Ayon kay Ombudsman Jesus Crispin Remulla, kasalukuyang nasa Pasig City at under surveillance si Discaya.

Sa nakaraang operasyon, siyam sa 16 personalidad na sangkot sa anomalya sa flood control projects sa Oriental Mindoro ay naaresto na, at inaasahang maglalabas pa ng karagdagang arrest warrant sa susunod na dalawang linggo.