10 pari nakapasa Bar exams

Nakapasa sampu na Katolikong pari at isang relihiyosong layperson sa 2025 Bar Examinations, ayon sa ulat ng Catholic Bishops’ Conference of the Philippines (CBCP) News noong Huwebes.

Kabilang sa mga bagong abogado sina Fr. Mcwellroe Bringas (Tagum City), Fr. Marcelo Operiano Jr. (Tagbilaran City), Fr. Danilo Dela Bajan (Masbate), Fr. Eric Marigondon (Legazpi), Fr. Gerald Lacson (Antique), at Fr. Joel Pepito Oriesga (Archdiocese of Cebu).

Dalawang chaplain mula sa Military Ordinariate ang nakapasa rin: Fr. Rommel Kiamko ng Philippine Air Force at Fr. Gil Rochar Dulay ng Bureau of Fire Protection.

Kabilang din ang Augustinian Fr. Generous Gonesto, Fr. Florante Moren mula sa Alagad ni Maria religious institute, at Brother Dominador Valdez Jr. ng Franciscan Friars of the Philippines.

Inanunsyo ng Korte Suprema na 5,594 mula sa 11,420 examinees ang nakapasa sa 2025 Bar Exams, na isinagawa noong Setyembre 7, 10, at 14 sa 14 testing centers sa buong bansa.