Freeze order vs ari-arian ng isang prominenteng mambabatas, inilabas ng CA — AMLC

KINUMPIRMA ng Anti-Money Laundering Council (AMLC) na naglabas ng panibagong freeze order ang Court of Appeals (CA) laban sa isang kasalukuyang mambabatas.

Ayon sa AMLC, bahagi pa rin ito ng kanilang imbestigasyon sa mga indbidwal na may kinalaman sa flood control scandal.

Hindi naman pinangalanan kung sino ang prominenteng mambabatas at ang business associate at corporate entity na nakitang sangkot sa mga anomalya.

Nakakita rin umano ng probable cause o sapat na batayan ang appellate court para iugnay ang kanilang mga ari-arian sa Plunder, Direct and Indirect Bribery at paglabag sa Anti-Graft and Corrupt Practices Act.

Saklaw ng inilabas na freeze order ang mga assets kabilang ang 25 bank accounts at 10 insurance policies na nakapangalan sa naturang mambabatas.

Bukod pa ito sa 27 bank accounts, 10 insurance policies at 1 investment account na nasa ilalim naman ng umano’y business associate ng mambabatas at 2 bank accounts, 7 property accounts at 1 real estate property na nakapangalan sa ilalim ng corporate entity.

Sinabi ni AMLC Executive Director Atty. Ronel Buenaventura, patunay ito na gumagawa sila ng hakbang para mapanagot ang mga sangkot at protektahan ang integridad ng financial system ng bansa.

Sa ngayon, nasa 12 petisyon para sa civil forfeiture na ang inihain ng AMLC sa korte laban sa mga dawit sa flood control anomaly.