SOLAR ENERGY, DAPAT SUPORTAHAN AT HINDI HADLANGAN

SA panahon ngayon kung kailan patuloy na tumataas ang presyo ng kuryente, maraming Pilipino ang tumitingin sa solar energy bilang praktikal at pangmatagalang solusyon.

Kaya naman mabilis ding kumalat ang mga balitang tila nais umanong panghimasukan ng Manila Electric Company (Meralco) ang solar industry.

Ngunit mahalagang magkaroon ng malinaw na paliwanag hinggil sa usaping ito upang maiwasan ang maling impormasyon at pangamba ng publiko.

Ang totoo, hindi ang Meralco ang pangunahing regulator ng solar energy sa bansa.

Ang mga ahensyang may kapangyarihan dito ay ang Energy Regulatory Commission (ERC), Department of Energy (DOE), at maging ang Department of Trade and Industry (DTI) para sa mga pamantayan ng kagamitan at installers.

Ang papel ng Meralco ay pangunahing nakatuon sa kaligtasan at maayos na koneksyon ng mga solar system na nakakabit sa kanilang distribution grid.

Mahalagang maunawaan na kapag ang isang solar installation ay konektado sa grid at maaaring magbalik ng kuryente o “backfeed,” kinakailangan talaga ng tamang inspeksyon, registration, at technical compliance.

Hindi ito para hadlangan ang paggamit ng solar energy kundi upang maiwasan ang sunog, electrocution, grid instability, at panganib sa mga line workers.

Ang kaligtasan ng publiko at katatagan ng suplay ng kuryente ay hindi maaaring balewalain.

Gayunpaman, dapat ding bantayan na ang mga patakarang pangkaligtasan ay hindi magamit bilang paraan upang gawing mabagal, magastos, o kumplikado ang paglipat ng mga tao sa renewable energy.

Hindi dapat mawalan ng saysay ang layunin ng batas na palawakin ang paggamit ng malinis at mas murang enerhiya para sa mga Pilipino.

Ang pinakamahalaga ngayon ay balanse.

Kailangan ang regulasyon para sa seguridad, ngunit kailangan din ang patas at bukas na sistema na susuporta sa lumalaking interes ng publiko sa rooftop solar at renewable energy.

Ang tunay na progreso ay hindi nanggagaling sa labis na kontrol kundi sa maayos na koordinasyon, malinaw na alituntunin, at tiwala sa kakayahan ng mga mamamayan na maging bahagi ng solusyon sa krisis sa enerhiya.

Masasabi natin na ang usapin ngayon ay hindi kung sino ang may kontrol sa solar panels, kundi kung paano mapapangalagaan ang kapakanan ng publiko habang isinusulong ang mas malinis, mas ligtas, at mas abot-kayang enerhiya para sa lahat.

***

Catch Gilbert Perdez on “IZ Balita Nationwide” over DWIZ 882 AM and ALIW Channel 23 every Saturday from 6:00 AM to 7:00 AM. Tune in via ALIW Channel 23, DWIZ AM Radio, the DWIZ 882 Facebook page, or DWIZ On-Demand on YouTube. You can contact him via email at gil.playwright@gmail.com or at 0991-354-3676.