GATCHALIAN, 2 BESES LUMABAG SA BATAS – ATTY. LUNA

Mariing iginiit ni Atty. Manuelito Luna na dalawang beses umanong nilabag ni Senador Sherwin Gatchalian ang Article 177 ng Revised Penal Code (RPC), o ang probisyong tumutukoy sa usurpation of authority and official functions.
Sa kanyang pahayag, sinabi ni Luna na may mga pagkakataon umanong kumilos si Gatchalian na para bang may kapangyarihang siyang magsagawa ng mga opisyal na tungkulin na hindi naman nakatalaga sa kanya sa ilalim ng batas. Ayon sa abogado, nararapat na busisiin ang ganitong mga aksyon at suriin upang matukoy kung may pananagutang kriminal na maaaring isumite laban sa senador.
Ipinaliwanag ni Luna na nagbibigay ng parusa ang Article 177 ng Revised Penal Code sa sinumang tao na magkunwaring opisyal ng gobyerno o magsagawa ng mga opisyal na tungkulin nang walang legal na awtoridad. Aniya, mahalagang mapanatili ang integridad ng mga institusyon ng gobyerno at matiyak na kumikilos lamang ang lahat ng opisyal sa loob ng saklaw ng kanilang kapangyarihan.
“Hindi maaaring balewalain ang mga ganitong usapin dahil nakasalalay dito ang paggalang sa batas at sa mga demokratikong proseso ng ating bansa,” ani Luna.
Kasabay nito, muling inungkat ng abogado ang umano’y malawakang anomalya sa mga proyektong pinondohan ng gobyerno, partikular ang mga alegasyon ng kickbacks na umano’y umabot sa daan-daang bilyong piso.
“Believe me, hindi papayag ang mga Pilipino na hindi managot ang lahat ng sangkot sa P805 bilyong pisong male-maletang kickbacks,” diin ni Luna.
Ayon sa kanya, hindi lamang ang mga mababang opisyal ang dapat managot kung mapatutunayang may naganap na katiwalian, kundi maging ang mga matataas na opisyal at sinumang nakinabang sa umano’y iligal na transaksyon.
Aniya, matagal nang hinihintay ng publiko ang buong katotohanan hinggil sa paggamit ng pondo ng bayan, lalo na sa mga proyektong inilaan para sa imprastraktura at flood control.
Iginiit pa ni Luna na mahalagang magkaroon ng malalim at independiyenteng imbestigasyon upang matukoy kung saan napunta ang pondo at kung sinu-sino ang mga dapat managot. Aniya, hindi dapat nakabatay ang pananagutan sa ilalim ng batas sa katayuan o impluwensiya ng isang tao kundi sa ebidensyang maihaharap laban sa kanya.
Samantala, wala pang opisyal na tugon si Gatchalian kaugnay ng mga pinakahuling pahayag ni Luna. Wala pang rin pinal na desisyon mula sa alinmang hukuman o ahensya ng gobyerno na nagpapatunay sa mga alegasyon ng paglabag sa Article 177 o sa mga paratang na may kaugnayan sa umano’y P805-bilyong kickback scheme.
Nanatiling mga alegasyon sa kasalukuyan ang mga paratang habang hinihintay ng publiko ang mga susunod na hakbang ng mga kinauukulang ahensya at ang posibleng pagsasampa ng mga kaukulang kaso laban sa mga indibidwal na iniuugnay sa kontrobersiya.