Dy astig sa panalo ng High Speed Hitters sa PVL On Tour

GINUHIT ng PLDT ang 25-21, 20-25, 29-27, 25-18 na panalo kontra Choco Mucho para simulan ang kanilang pagtatangkang panatilihin ang titulo sa PVL On Tour Sabado ng gabi sa Chavit Coliseum sa Vigan, Ilocos Sur.

Pinangunahan ni Kim Kianna Dy ang High Speed Hitters sa iniskor na 17 puntos, kasunod si Savannah Dawn Davison na may 13 puntos, kabilang ang tatlong blocks.

Nag-ambag si Mika Reyes ng 12 puntos mula sa 10 atake at dalawang block, habang si Mary Joy Baron ay may 10 puntos.

Sa panalo, nakasunod ang PLDT kina Galeries Tower at Creamline sa 1-0, na nasa likod ng nangungunang ZUS Coffee, na nanalo sa unang dalawang laro nito sa pre-season tournament.

Umiskor sina Caitlyn Viray at Isa Molde na may 16 at 14 puntos, ayon sa pagkakasunod, para sa Choco Mucho, na bumagsak sa 0-2 matapos ang isang nakaraang straight-set na pagkatalo laban sa ZUS Coffee.

Kulang ang Flying Titans ng mga pambansang manlalaro na sina Sisi Rondina at Eya Laure, pati na rin ang beteranong scorer na si Kat Tolentino, na patuloy pang nagpapagaling matapos ang operasyon sa pumutok na appendix.

Samantala, nagtala si Myla Pablo ng 17 puntos, kasama ang apat na blocks, habang natalo ng Nxled ang Capital1, 25-15, 25-23, 25-18.

Nagdagdag naman si Jonah Escamillan ng 13 puntos, kasama ang dalawang blocks, habang si MJ Phillips ay may pitong puntos para sa Chameleons, na nakamit ang kanilang unang panalo matapos matalo sa Creamline Cool Smashers sa Ilagan City, Isabela noong Hulyo 8.

Nagtala si Shaya Adorador ng anim na puntos, habang sina Trisha Genesis, Sydney Niegos at Jimenez ay nagtala ng tig-limang puntos para sa Capital1, na nakaranas ng kanilang unang pagkatalo.