KUNEHO SA PARCEL, MAY “KETAMINE” SA LOOB!

Hindi lahat ng mukhang laruan ay inosente.

Minsan, ang isang simpleng palamuti ay puwedeng maging pambalot ng malaking problema—at ito mismo ang natuklasan ng mga tauhan ng Bureau of Customs (BOC) Port of Clark nang masilip ang isang resin rabbit figurine na galing France.

Sa unang tingin, ordinaryong dekorasyon lang. Ang deklarasyon pa nga: “Indoor Decorative Molded Polyresin Ornament.”

Pero may ibang kuwento ang laman.

Sa tulong ng Philippine Drug Enforcement Agency (PDEA) at Clark Inter-Agency Task Force Against Illegal Drugs, nasabat ang tinatayang 1,675 gramo ng hinihinalang ketamine na nagkakahalaga ng ?8.375 milyon.

At saan itinago?

Sa loob ng kuneho.

Dito makikita kung gaano ka-creative – at ka-desperado – ang mga sindikato sa pagtatago ng kanilang kontrabando. Resin figurine na dapat sana’y simpleng dekorasyon, ginawa pang lalagyan ng ilegal na droga.

Pero hindi nakalusot.

Nag-ugat ang operasyon sa derogatory information na ibinigay ng PDEA tungkol sa paparating na parcel mula France. Nang sumailalim sa standard Customs inspection, dumaan ito sa K-9 sniffing operation.

At dito nagsimulang mabuking ang sikreto ng kuneho.

Nagpositibo ang K-9 sa indikasyon ng ilegal na droga kaya isinailalim ang shipment sa 100% physical examination.

Nang buksan at suriin ang resin rabbit, doon nakita ang puting mala-kristal na substance na hinihinalang ketamine. Kinumpirma rin ng initial screening gamit ang Rigaku Spectrometer ang presensya ng naturang kontrabando.

Hindi biro ang halagang nasabat- P8.375 milyon.

At mas mahalaga kaysa halaga ng droga ang mensaheng ipinapakita ng operasyon: hindi puwedeng kampante ang mga nagtatangkang magpuslit ng kontrabando sa bansa.

Mismong si Port of Clark District Collector Jairus S. Reyes ang nagdiin sa kahalagahan ng pagtutulungan ng mga ahensiya.

Iisa lamang umano ang layunin ng BOC at mga katuwang nitong law enforcement agencies—mapigilan ang pagpasok ng ilegal na droga at maprotektahan ang mga komunidad.

Tama.

Sa panahon ngayon, hindi na sapat ang simpleng pagbabantay sa mga kahina-hinalang kahon o bag. Kailangang maging mapanuri sa bawat deklarasyon, bawat parcel at bawat paraan ng pagtatago na ginagamit ng mga smugglers.

Dahil kung ang isang kuneho ay puwedeng gawing taguan ng milyun-milyong pisong droga, ano pa kaya ang susunod?

Kaya saludo tayo sa mga Customs examiner, K-9 handlers at sa mga katuwang na ahensiyang hindi basta nagpapadala sa itsura ng isang shipment.

Sa pamumuno ni Customs Commissioner Ariel F. Nepomuceno, malinaw ang direksiyon: palakasin ang pagbabantay sa mga paliparan at ports of entry at huwag bigyan ng puwang ang mga sindikato.

At sa kaso ng kunehong may ketamine, isang bagay ang malinaw:

MUKHANG DEKORASYON, PERO KONTRABANDO PALA.

Hindi nakalusot ang kuneho.

At sana, maging aral ito sa mga susunod pang magtatangkang gawing entry point ng ilegal na droga ang ating mga paliparan at pantalan.

Sa BOC, walang lugar ang “bunny” sa puslit na droga.