Prosekusyon gagawing hostile witness si Mayor Baste sa impeachment trial

IHIHIRIT ng House prosecution sa Impeachment Court na ideklarang hostile witness si Davao City Mayor Sebastian “Baste” Duterte kapag humarap siya bilang testigo sa impeachment trial ng kanyang kapatid na si Vice President Sara Duterte.

Sinabi ni House prosecution legal spokesperson at counsel Benjamin Tolosa Jr., kailangang mapatunayan muna na salungat sa interes ng prosekusyon ang interes ni Baste bago siya ideklarang hostile witness.

Kapag pinagbigyan ang kahilingan, mas maluwag ang magiging paraan ng pagtatanong ng mga prosecutor kay Mayor Baste, kabilang ang paggamit ng leading questions, subalit nasa Impeachment Court ang pinal na desisyon.

Bahagi ng testimonya ni Baste ang paglipat ng prosekusyon mula sa sariling SALN ni Sara Duterte patungo sa mga rekord mula sa mga kumpanya at ahensya ng gobyerno.

Sa Article II ng impeachment case, kabilang sa alegasyon na hindi umano isinuko ni Sara Duterte ang kanyang mga interes sa negosyo at patuloy na nakilahok sa mga negosyo habang bise presidente.

Inaasahang ihaharap muna ng prosekusyon ang mga opisyal mula sa Civil Service Commission, Securities and Exchange Commission at Philippine Government Electronic Procurement System upang magpatunay at magharap ng mga rekord.

Gagamitin ang mga rekord upang ihambing ang mga idineklarang interes ni Sara Duterte sa kanyang SALN sa mga dokumento mula sa mga kumpanya at ahensya ng gobyerno.

Orihinal na nakatakdang humarap si Baste sa Setyembre 23, kasama sina lawyer Gary Samonte at Police Major Jerrickson Sangalang.

Maaari pa itong magbago dahil nakatakda ring dinggin sa araw na iyon ang mga argumento tungkol sa bilang ng boto na kailangan para sa conviction ni Sara Duterte.

Si Samonte ay inaasahang magbibigay ng mga rekord mula sa PhilHealth Regional Office XI, habang si Sangalang ay magbibigay ng impormasyon tungkol sa mga baril na nakarehistro sa pangalan ni Sara Duterte at ng kanyang asawang si lawyer Manases Carpio.