Police Corporal timbog sa ‘Reassignment for sale’

DINAKIP ng mga operatiba ng Philippine National Police-Integrity Monitoring and Enforcement Group (PNP-IMEG) ang isang pulis sa isinasangkot sa pangingikil.

Kinilala ang pulis na si Corporal Michelle Ann Repolles, 33 anyos, nakatalaga sa opisina ng Deputy Chief for Administration ng Makati City Police Station.

Ayon kay IMEG Director, Brigadier General Warren de Leon, naaresto si Repolles sa mismong Makati Central Police Station nitong Huwebes.

Inirereklamo si Repolles dahil sa pangongolekta ng P10,000 hanggang P30,000 sa mga pulis na nais magpalipat ng assignment.

Mayroon daw kasing koneksyon si Repolles sa Directorate for Personel and Records Management na nagpoproseso ng reassignment orders.

Kasunod ng impormasyong ito, nagkasa ang IMEG ng entrapment operation sa tulong narin ng Makati Police dahilan para masakote si Repolles.

Nakatakdang ipagharap ng kasong ‘extortion’ si Cpl. Repolles. (Mark Obleada)