Most wanted na miyembro ng teroristang ASG timbog sa QC

NADAKIP ang isang miyembro ng teroristang Abu Sayyaf Group (ASG) sa operasyon sa Quezon City.

Kinilala ang nadakip na si Janhar Abdulhari alyas Janjan o Julpikar Pendiwata, 37 anyos, No. 7 Most Wanted Person (Municipal Level) at No. 5 (Provincial Level) ng Zamboanga.

Ayon kay Southern Police District (SPD) Director, Brigadier General Kirby John Kraft, si Abdulhari ay nadakip ng mga pinagsanib na elememto ng District Special Operations Unit (DSOU) at District Mobile Force Battalion (DMFB), SPD, National Intelligence Support Group-NCR, Quezon City Police District-DSOU, 3rd Special Operations Unit ng Philippine National Police Maritime Group, at ng Presidential Anti-Organized Crime Commission (PAOCC) sa Tierra Pura Homes, Tandang Sora, Quezon City Miyerkoles ng hapon.

Base ang operasyon sa warrant of arrest sa kasong murder na ipinalabas ni Judge Anthony Dela Torre Isaw ng Regional Trial Court Branch 24 sa Ipil, Zamboanga Sibugay noong May 24, 2022.

Nasa kustodiya ngayon ng District Special Operations Unit (DSOU) sa SPD si Abdulhari. (Mark Obleada)