Kathryn kinabog sina Marian, Maine, Anne at Sharon bilang product endorser

Ni ROMMEL PLACENTE

MULA nang mahiwalay kay Daniel Padilla ay mas lalong sumikat si Kathryn Bernardo. Kumbaga, mas lalong umarangkada ang kanyang career.

Malaking factor din dito ang pagkakaroon niya ng wholesome image kaya patok siya sa  mga advertiser.

Ayon sa kibitzers, ang tinaguriang Asia’s Phenomenal Superstar din daw ang tinaguriang queen of endorsements sa kasalukuyan.

Paano kasi approximately 28 big name brands ang nagtiwala sa kanya at dumarami pa ang patuloy na nagtitiwala sa kanya bilang brand ambassador.

From beverage, food, haircare, skincare, at clothing products, nadagdagan pa ng telco, toothpaste, bangko, energy drink, derma clinic, mattresses, vitamins, medicine, digital payments company at kung anu-ano pa ang kanyang ini-endorse.

Hirit pa ng kibitzers, kinabog na ni Kathryn sina Maine Mendoza, Marian Rivera, Anne Curtis at Sharon Cuneta sa paramihan ng produktong ini-endorse.

Pagdating naman sa advertising campaign ng kanyang mga produkto, palaging bongga ang mga ito kaya naman damang-dama ang overwhelming support sa kanya ng advertisers mapa-TV, online, o billboards man.

Di ba nga, sinakop niya ang isang espasyo sa EDSA kung saan namutiktik ang kanyang billboards na di pa nangyari kahit kaninong celebrity.

Idagdag pa na at the age of 28 ay isa na rin siyang matagumpay na businesswoman na bukod sa may sariling salon ay isa sa may-ari ng pamoso at high-end resort sa El Nido, Palawan.

***

CRISTINE REYES NA-SCAM NG DONASYON PARA SA MGA BATANG MAY MENTAL CONDITION

AYON kay Cristine Reyes ay na-scam siya, nang hingan siya ng tulong at donasyon ng isang grupo para sa mga batang may mental condition.

Kuwento ng aktres, ginagamit daw ng mga scammer ang National Center for Mental Health para makapanloko at isa nga raw siya sa nabiktima ng mga ito.

Naibahagi ito ng aktres sa kanyang Instagram account nang mamahagi siya ng pagkain at iba pang personal na kailangan sa NCMH.

Ang caption ni Cristine sa kanyang IG video, “Masaya at simple ang araw na ito noong Mayo 24, 2024. Nakaipon kasi kami ng mga kasama ko at nakabili kami ng pagkain at mga pangangailangan ng mga kapwa natin sa NCMH.”

At dito na ipinagtapat ng aktres ang karanasan niya noong 2021.

“Hindi ko lang maalis sa isip ko na malungkot dahil noong 2021 may mga taong lumapit sa akin. Sabi nila may mga bata raw na may malubhang sakit.

“Hindi ako nag-atubiling tumulong. Lumapit ako sa mga kaibigan at kakilala ko at nakaipon ng mahigit kalahating milyon sa loob lamang ng isang linggo.

“Sa masakit na kapalaran.. Wala akong nabalitaan o nakita man lang sa mga batang may malubhang sakit at pilit ko tinatanong kung puwede ko sila mabisita at makita kung saan napunta ang aming naipon noon.

“Nahihiya ako sa mga nagbigay ng donasyon at nalulungkot ako na minsan ay nagamit ako ng ibang tao na nagsabing ibibigay nila ang tulong na iyon para sa mga batang may malubhang sakit.

“Para sa mga boss ko, kapwa artista at mga ibang nakatrabaho na nagbigay noong 2021 ng donasyon humihingi ako ng paumanhin.

“Hindi ko nakakalimutan hanggang ngayon na nagbigay ako ng pangako sa inyo na ipapakita ko kung saan mapupunta ang kabutihang loob ninyo.

“Magsisilbing aral iyon sa akin. Ako ay nag-tanda.

“Maraming tao ang magpapanggap at mang-aabuso. Bahala na sa inyo ang Maykapal. Malungkot man isipin na ngayon maliit lamang ang aking naipon para naman sa mga kapwa natin sa NCMH.

“Alam ko malinis ang aking hangarin para tumulong. Kahit maliit lamang ang aming naipon ngayon, okay lang. Kasi itong maliit na salo-salo na ito ay naging masayang araw para sa amin lahat.

“Salamat NCMH dahil sa pagbukas ng inyong pinto para sa akin marami akong napulot na aral dahil dito. Maraming salamat sa pagtitiwala.”