P47M ILLEGAL NA PAGKAIN NASABAT NG BOC SA PORT OF SUBIC

Bilang pagtugon sa direktiba ni Pangulong Ferdinand R. Marcos Jr., na tiyakin na tanging ligtas at sumusunod na produkto lamang ang mabebenta sa lokal na pamilihan, pinalalakas ng Bureau of Customs (BOC), sa ilalim ng pamumuno ni Komisyoner Ariel F. Nepomuceno, ang mga hakbang sa kontrol sa hangganan, na nagresulta sa pagsabat ng P47.436 milyon na halaga ng iba’t-ibang frozen at processed food products sa Port of Subic.
Ayon sa Komisyoner, patuloy na paiigtingin ng BOC ang mga intelligence-driven enforcement measures, na itinuturing na susi sa pagbuwag ng mga network ng agricultural smuggling na nagbabalakid sa seguridad ng bansa at kaligtasan ng publiko.
Bunga ang operasyon ng makabuluhang impormasyon na natanggap mula sa Customs Intelligence and Investigation Service (CIIS) hinggil sa mga shipment na naglalaman ng maling deklaradong agricultural products, na humantong sa pag-isyu ng Alert Orders.
Nang matuklasan ang kasunod na mga padating na kargamento mula sa China na may parehong deklarasyon, naglabas din ng Pre-Lodgement Control Orders (PLCOs). Upang mapatunayan ang laman ng mga kargamento, isinagawa ang 100% physical examination, na nagresulta sa pagkakatuklas ng 3,192 karton ng iba’t-ibang pagkain, kabilang ang frozen beef, pork, manok, pato, at iba pang pastry at seafood items, sa halip na deklaradong “assorted shabu-shabu balls.”
Noong Marso 27, 2026, ipinakita ang nasabat na mga produkto sa media sa isang inspeksyon na pinangunahan ni Comm. Ariel F. Nepomuceno, kasama si Department of Agriculture (DA) Undersecretary Carlos Carag at mga pangunahing opisyal ng BOC, na nagpakita ng matibay na kooperasyon ng iba’t ibang ahensya at patuloy na pangako ng BOC sa transparency sa kanilang operasyon.
Ayon kay District Collector Noel Estanislao, higit pang paiigtingin ng Port of Subic ang kanilang mga hakbang upang mapanatili ang seguridad ng bansa laban sa agricultural smuggling at iba pang ilegal na kalakalan.
Lumalabag ang mga nasabing shipment sa Sections 1400 at 118 (e), kaugnay ng Sections 117 at 1113 (f), (l)(4), at (l)(5) ng Customs Modernization and Tariff Act (CMTA), Republic Act No. 9711 (Food and Drug Administration Act of 2009), at Republic Act No. 10611 (Food Safety Act of 2013).
Patunay ang operasyon na ito ng tuloy-tuloy at matibay na pangako ng BOC na protektahan ang publiko laban sa mga produktong hindi ligtas at hindi sumusunod sa batas, kasabay ng pagtiyak sa proteksyon ng lehitimong kita ng pamahalaan, bilang bahagi ng kanilang reporma sa ilalim ng Integrity, Accountability, and Modernization (IAM) Program.(BP)