Lacson: Flood control partial report, kulang na lang ng 3 pirma para maisumite

DALAWA pang senador ang lumagda sa partial report ng Senate Blue Ribbon Committee kaugnay ng flood control scandal.

Ito ang inihayag ni Senate President Pro Tempore at Blue Ribbon chairman Panfilo “Ping” M. Lacson kung saan lumagda na sa partial report si Senate President Vicente Sotto III at Blue Ribbon vice chairman Erwin Tulfo, habang hindi bababa sa dalawa pa ang nagpahiwatig na pipirma rin.

“As of yesterday, two other colleagues also signed – Senate President Sotto as ex-officio and Sen. Erwin Tulfo, BRC Vice Chairman. At least two others have indicated their willingness to sign,” ani Lacson.
“One of the reasons why the other majority members have not signed or at least reluctant to do so is that they were being ‘requested’ by some of their former majority bloc colleagues,” ayon pa sa senador.

Ani Lacson, bagama’t hindi niya pipilitin ang kapwa miyembro sa Blue Ribbon na lumagda sa partial report bilang paggalang sa kanilang mga indibidwal na desisyon, nag-alok si Sotto na tumulong.

“I told SP Sotto earlier that I won’t plead with our fellow BRC members to affix their signatures on the partial committee report because I respect their individual decisions, whatever reasons they have in refusing to sign. Hence, SP Sotto promised to help in that regard,” aniya.

Sa ngayon, hindi bababa sa anim na ang lagda sa partial report, at kailangan pa ng tatlo upang ito ay maihain at maipresenta sa plenaryo, kung saan maaari itong pagdebatehan, amyendahan, at pagtiba-yin.

Noong Miyerkules, sinabi ni Lacson na sinuspinde niya ang mga susunod pang pagdinig ng komite hinggil sa flood control hanggang maipresenta at maisponsor niya ang partial committee report sa plenaryo.

Ang pagpapatuloy aniya ng mga pagdinig nang hindi umaabot sa lohikal na konklusyon sa anyo ng isang committee report—na maaaring pagdebatehan, amyendahan, at pagtibayin sa Senado—ay magiging walang saysay at salungat sa mga tuntunin ng Senado. (Mylene Alfonso)