Alex Eala dumating sa Rome para sa 2026 Italian Open

DUMATING ang Pilipinang tennis sensation na si Alex Eala sa Rome Linggo at nagsimulang maghanda para sa 2026 Italian Open na nakatakda mula Mayo 5 hanggang 17 sa Foro Italico complex.

Ang prestihiyosong claycourt na torneo, na kilala rin bilang Internazionali BNL d’Italia, ay magsisilbing paghahanda ni Eala para sa French Open sa Paris, na nakatakda mula Mayo 18 hanggang Hunyo 7.

Sa edisyon ng Italian Open noong 2025, natalo si Eala kay Marta Kostyuk ng Ukraine sa unang round, 0-6, 1-6, ngunit nakapasok siya sa quarterfinals ng doubles kasama ang taga-United States na si Coco Gauff.

Ilan sa iba pang malalaking pangalan na sasabak sa Italian Open 2026 ay sina Aryna Sabalenka, Elena Rybakina, Iga Swiatek at Gauff, ang mga No. 1 hanggang 4 sa mundo.

Umaasa si Eala na makabawi mula sa isang mahirap na kampanya sa Madrid Open, kung saan siya ay nakarating sa ikalawang round ng singles.

Sa kabila ng pagkatalo sa 19th seed na si Elise Mertens ng Belgium, pinabuti pa rin ng 20-anyos na si Eala ang kanyang ranggo ng dalawang posisyon pataas hanggang sa No. 42.