PNP tracker team ikinalat na laban kay Sen. Bato

KINUMPIRMA ng Philippine National Police nitong Biyernes, Mayo 22, 2026, na nag-deploy ito ng tracker teams katuwang ang National Bureau of Investigation (NBI) upang hanapin at isilbi ang arrest warrant laban kay Senador Ronald “Bato” Dela Rosa, na pinaghahanap ng International Criminal Court.
Ayon kay PNP chief General Jose Melencio Nartatez Jr., inatasan ang lahat ng units na mahigpit na sundin ang operational procedures at igalang ang karapatang pantao sa pagpapatupad ng warrant. Giit din niya na paiiralin ang “maximum tolerance” at propesyonalismo sa buong operasyon.
“The Philippine National Police operates strictly under the rule of law. I have issued clear instructions to all local and specialized units that any enforcement action concerning Senator Dela Rosa must be executed with absolute transparency, full adherence to police operational procedures, and the utmost respect for human rights,” pahayag ni Nartatez.
Dagdag pa niya, isasagawa ng pulisya ang mandato nito nang walang kinikilingang pulitikal sa gitna ng lumalakas na atensyon ng publiko sa kaso sa ICC. “Our mandate is clear but I am emphasizing to our personnel that operational discipline is paramount. There will be no shortcuts and every movement will be heavily aligned with existing protocols to protect constitutional rights and maintain public trust,“ aniya.
Nauna nang iniutos ng Department of Justice sa PNP at NBI na ipatupad ang arrest order laban kay Dela Rosa, na dating hepe ng PNP at pa-ngunahing personalidad sa kampanya kontra droga ng nakaraang administrasyon.
Ang imbestigasyon ng ICC ay kaugnay ng mga paratang ng crimes against humanity na may kaugnayan sa war on drugs, na binatikos ng mga human rights group dahil sa libo-libong pagkamatay sa mga operasyon ng pulisya.
Mariing ipinagtanggol ni Dela Rosa ang kampanya at kinuwestyon ang awtoridad ng ICC sa pagsisiyasat sa Pilipinas.
(Mark Obleada)