WALKOUT NG SENATE MINORITY SA ONLINE VOTING BINATIKOS; LUMANG RESOLUTION INUNGKAT

NAGING sentro ng usapin sa Senado ang pa-walkout ng ilang miyembro ng minority bloc kaugnay ng isyu ng online at electronic voting, bagay na agad umani ng samu’t saring reaksiyon mula sa publiko at political observers.

Nangyari ang walkout nang magkaroon ng pagtatalo sa plenaryo hinggil sa paggamit ng remote participation at electronic voting sa mga sesyon ng Senado.

Gayunman, kasunod ng insidente ay muling inungkat ang mga naunang resolusyon sa Senado na nagpapakita na ilan sa mga senador na tumututol ngayon sa online voting ay dati rin nagsulong ng paggamit ng remote participation sa lehislatura.

Batay sa records ng Senado, Hulyo 31, 2019 ay inihain nina dating Senador Panfilo “Ping” Lacson at dating Senate President Franklin Drilon ang Proposed Senate Resolution No. 51.

Layunin ng naturang resolusyon na pahintulutan si dating Senadora Leila de Lima, na noon ay nakakulong, na makadalo sa plenary sessions sa pamamagitan ng teleconferencing technology.

Sa explanatory note ng resolusyon, sinabi noon ng mga may-akda na ang kawalan ng isang halal na senador sa plenaryo ay nagkakait sa milyun-milyong Pilipino ng wastong representasyon sa Senado.

Binigyang-diin din sa panukala na mahalaga ang partisipasyon ng bawat miyembro upang mapanatili ang tinawag nilang “collective wisdom” ng kapulungan sa pagtalakay ng mahahalagang batas at pambansang usapin.

Hindi nagtagal, muling isinulong sa Senado ang paggamit ng remote participation.

Noong Pebrero 23, 2021, inihain naman nina Drilon, Sen. Risa Hontiveros, Sen. Francis “Kiko” Pangilinan at dating Sen. Ralph Recto ang Proposed Senate Resolution No. 658.

Mas pinalawak sa naturang panukala ang saklaw ng online participation dahil hindi lamang plenary sessions ang sakop kundi maging committee hearings at iba pang opisyal na gawain ng Senado gamit ang electronic communications at online platforms.

Ayon sa mga may-akda noon, mahalaga ang paggamit ng teknolohiya upang matiyak ang tuloy-tuloy na operasyon ng Senado lalo na sa panahon ng extraordinary circumstances.

Sa kasagsagan ng COVID-19 pandemic, pormal ding kinilala ng Senado ang hybrid setup at remote voting sa ilalim ng Senate Resolution No. 43.

Sa ilalim nito, inamyendahan ang Rules 22 at 41 ng Senate Rules upang pahintulutan ang hybrid sessions at remote voting kapag may national emergency, kalamidad, force majeure o iba pang pambihirang sitwasyon.

Dahil dito, maraming netizens at political observers ang nagtatanong kung bakit tila nagbago ang posisyon ng ilang senador sa usapin ng online at electronic voting.

May ilang nagsabing tila may “double standard” sa isyu dahil dati na itong itinulak ng ilang senador na ngayon ay mariing kumukuwestiyon dito.

May mga nagsabi ring hindi na bago sa Senado ang paggamit ng teknolohiya sa legislative process dahil naranasan na ito noong panahon ng pandemya kungsaan ipinagpatu-loy ng Senado ang sesyon at pagdinig sa pamamagitan ng online platforms.

Binatikos din ng ilang sektor ang walkout ng minority bloc, sinabing mas makabubuti ipagpatuloy ang debate sa plenaryo kaysa iwanan ang sesyon.

Ayon sa ilang observers, bahagi ng mandato ng mga senador ang paglahok sa deliberasyon at paglalahad ng kanilang posisyon sa pamamagitan ng argumento at interpellation.

Patuloy na pinag-uusapan sa social media at political circles ang insidente, lalo na at muling nabuksan ang diskusyon hinggil sa consistency ng mga posisyon ng mga mambabatas sa mga polisiya ng Senado.