Sharon Cuneta ipinamana kay KC Concepcion ang 40-year-old Cartier watch

By Anne Venancio

Ibinahagi ni Sharon Cuneta na ipinamana na niya sa anak na si KC Concepcion ang kanyang Cartier Santos watch na mahigit 40 taon na niyang iniingatan.

Sa kanyang Instagram post, sinabi ng Megastar na ang naturang relo ang kauna-unahang mamahaling timepiece na binili niya para sa sarili noong siya ay 16 o 17 taong gulang pa lamang.

Kwento niya, naging bahagi ang relo ng maraming mahahalagang yugto ng kanyang buhay at karera. Kabilang dito ang panahon ng paggawa nila ni Gabby Concepcion ng pelikulang “Sa Hirap at Ginhawa” noong 1984, kung kailan ipinagbubuntis pa lamang niya si KC.

Ibinahagi rin ng aktres ang mga lumang larawan kung saan suot niya ang naturang relo, at ipinakita rin ang kasalukuyang larawan ni KC habang ginagamit na ito.

Ayon kay Sharon, masaya siyang makita ang kanyang anak na suot ang relo na may malaking sentimental value para sa kanilang pamilya.

Batay sa mga ulat mula sa watch market platforms, ang vintage Cartier Santos watches ay maaaring nagkakahalaga ng libu-libong dolyar depende sa modelo, kondisyon, at taon ng paggawa.
Aniya, mas mahalaga ang sentimental na halaga ng relo kaysa presyo nito.