Natatanging barangay sa Maynila, pinarangalan ni Manila LGU

Pinarangalan ni Mayor Isko Moreno noong Lunes ang mga natatanging barangay ng lungsod at hinimok ang mga lokal na opisyal na manatiling nakatuon sa paghahatid ng resulta, na binigyang-diin na ang epektibong serbisyo publiko ay nasusukat sa mga nagawa, hindi sa pagkakaiba sa pulitika.

Sa recognition program para sa mga outstanding barangay mula sa anim na distrito ng Maynila, pinuri ni Moreno ang mga barangay leader sa kanilang ambag sa pag-unlad ng komunidad at hinikayat silang ipagpatuloy ang pagpapabuti ng pamamahala sa grassroots level.

“Walang perpektong organisasyon, maging sa mga barangay o sa city government,” sabi ni Moreno. “Laging may pagkakaiba at pansariling interes, pero ang pinakamahalaga ay ang resulta ng ating trabaho.”

Binigyang-diin ng alkalde na ang mga residente sa huli ay huhusga sa mga public official batay sa mga programa at serbisyong kanilang ibinibigay, hindi sa political disputes o mga pamumuna.

“Ang resulta ang mahalaga,” sabi ni Moreno sa mga barangay official. “Maaaring makarinig ang tao ng mga pamumuna at kontrobersya, pero kapag nakita nila ang konkretong ebidensya ng nagawa para sa kanila, iyon ang kanilang matatandaan.”

Sinabi ni Moreno na makikita ang tagumpay ng mga barangay sa kalidad ng serbisyong naibigay sa mga residente, at binanggit na madalas na mas nangingibabaw ang mga konkretong pagbabago sa komunidad kaysa sa ingay sa pulitika.

Tiniyak din niya sa mga lokal na opisyal na patuloy na susuportahan ng city government ang mga barangay sa pamamagitan ng pondo at development initiatives na naglalayong palakasin ang pamamahala sa grassroots.

Sa aktibidad, inanunsyo ni Moreno na napirmahan na niya ang pagpapalabas ng P127 milyon mula sa first-quarter Revenue Participation Program o RPP funds para sa mga barangay ng Maynila.

Sinabi ng alkalde na makakatulong ang pondong ito sa pagsuporta sa mga lokal na programa, public services, at community-based projects sa kabuuang 896 na barangay ng lungsod na nasa anim nitong distrito.

Hinimok ni Moreno ang mga barangay leader na i-maximize ang mga available na resources at manatiling nakatuon sa epektibong paglilingkod sa kanilang mga nasasakupan.

Itinampok ng recognition ceremony ang mga tagumpay ng mga outstanding barangay na nanguna sa pamamahala, paghahatid ng serbisyo publiko, at community programs, na binigyang-diin ang kritikal na papel ng mga village official sa pagsusulong ng development agenda ng city government.

“Bilang mga lider, ang tungkulin natin ay maghatid ng resulta,” sabi ni Moreno. “Sa huli, ang mahalaga ay kung ano ang nagawa natin para mapabuti ang buhay ng mga taong ating pinaglilingkuran.” (Jocelyn Domenden)