PBBM BINIDA ANG PEZA SA SONA; ECOZONES, MAKINA NG PAMUMUHUNAN AT TRABAHO!

Itinampok ni Pangulong Ferdinand R. Marcos Jr. sa kanyang 2026 State of the Nation Address (SONA) ang mahalagang papel ng mga economic zone sa pagpapalakas ng ekonomiya ng bansa, pag-akit ng mas maraming pamumuhunan, at paglikha ng libu-libong trabaho para sa mga Pilipino.

Ayon sa Pangulo, patuloy ang paglago ng mga ecozone sa nakalipas na tatlong taon, habang lumalawak ang mga oportunidad sa pamumuhunan hindi lamang sa Metro Manila kundi maging sa iba’t ibang bahagi ng Luzon, Visayas, at Mindanao. Binanggit din niya ang mga bagong idineklarang ecozone sa Dumaguete at Misamis Oriental, gayundin ang layunin ng administrasyon na maisulong ang pagtatatag ng isang ecozone sa Palawan.

Kasabay nito, kinilala rin ang patuloy na pagsisikap ng Philippine Economic Zone Authority (PEZA) sa pagpapalakas ng investment climate ng bansa sa ilalim ng pamumuno ni Director General Tereso O. Panga.

Malugod namang tinanggap ni Panga ang pagkilala ng Pangulo sa PEZA, na aniya ay nagpapatunay sa mahalagang papel ng ahensya sa pagsasalin ng mga pamumuhunan tungo sa mga bagong trabaho, paglago ng ekonomiya, at mas maraming oportunidad para sa mga Pilipino.

Ayon kay Panga, ang pagbanggit ng Pangulo sa pagdami ng foreign investments sa pamamagitan ng Green Lane initiative ay nagpapakita ng patuloy na pagtitiwala ng mga mamumuhunan sa Pilipinas at sa kakayahan ng mga ecozone na gawing aktuwal na negosyo at kabuhayan ang mga investment commitment.

“Our ecozones continue to transform investments into jobs, growth, and opportunities for Filipinos,” ani Panga.

Pinasalamatan din niya ang PEZA Board of Directors, pamunuan, mga empleyado, ecozone developers, locator companies, at iba pang stakeholders na aniya’y nagtulungan upang mapanatili ang matatag na performance ng ahensya sa nakalipas na tatlong taon.

Batay sa datos ng PEZA mula Enero hanggang Hulyo 2026, umabot na sa P151.901 bilyon ang naaprubahang investments mula sa 174 proyekto, na inaasahang lilikha ng 26,047 direktang trabaho at magdadala ng US$5.905 bilyon sa projected exports.

Kabilang din dito ang 25 big-ticket projects na nagkakahalaga ng P131.661 bilyon, na nagpapakita ng patuloy na pagtaas ng kumpiyansa ng mga lokal at dayuhang mamumuhunan sa Pilipinas.

Ayon sa PEZA, ang pagkilala ng Pangulo sa SONA ay hindi lamang pagpapatunay sa naging ambag ng mga ecozone sa ekonomiya, kundi pagkilala rin sa patuloy na misyon ng ahensya na itaguyod ang pamumuhunan, pagpapalawak ng export industry, paglikha ng trabaho, at inklusibong paglago ng ekonomiya sa buong bansa.