4 testigo sasalang sa ika-6 na linggo ng impeachment trial vs VP Duterte

NAKATAKDANG sumalang sa witness stand ang apat na testigo sa pagpapatuloy ng impeachment trial laban kay Vice President Sara Duterte sa Agosto 10, 11, at 12, 2026.

Kabilang dito si Xylene May del Campo, supervising auditor mula sa Commission on Audit–Intelligence and Confidential Funds Audit Office (COA-ICFAO) na tumestigo na rin ngayong Miyerkules. Sasalang siya para magbigay ng testimonya kaugnay ng Article I, na tumatalakay sa umano’y maling paggamit at iregularidad sa likidasyon ng P612.5 milyong confidential funds ng Office of the Vice President (OVP) at Department of Education (DepEd).

Kasama rin sa tetestigo si Marivic Pareja, ang pinuno o chief ng House Archives. Siya ay ipata-tawag upang mag-prisinta at mag-papatunay sa mga opisyal na dokumento at rekord na hawak ng Kamara na may kinalaman sa kaso.

Gayundin si Gina Acosta, dating Special Disbursing Officer ng Office of the Vice President (OVP). Siya ay itinalagang humawak at naglabas ng mga pondo sa ilalim ng pamamahala ni VP Sara at si Edward Fajarda, dating Special Disbursing Officer ng Department of Education (DepEd). Siya ang naging responsable sa mga paggasta at pamamahagi ng confidential funds noong si Duterte pa ang Kalihim ng Edukasyon.

Ipinag-utos naman ng Trial Presiding Officer ang pag-isyu ng subpoena sa mga nabanggit na mga testigo ng prosekusyon para dumalo sa impeacment trial sa susunod na linggo.

Magbabalik ang paglilitis sa Lunes, Agosto 10, sa ganap na ika-10 ng umaga.