Gonzales pamumunuan ang PH team sa Pickleball World Cup

PAMUMUNUAN ni Ruben Gonzales ang koponan ng Pickleball World Cup sa Danang, Vietnam.

Sasabak rin sina Nik Isagan,Kelsey Laurente at Fatima Amirul sa 70- bansang paligsahan na nakatakda simula sa Agosto 30 hanggang Setyembre 6.

“It’s an honor to represent the Philippines in pickleball now. I’ve been with the national tennis team since 2010 and this is my first time playing for our country in pickleball,” wika ni Gonzales sa Philippine Sportswriters Association Forum sa Rizal Memorial Sports Complex sa Malate, Manila Martes.

Nanalo si Gonzales ng gintong medalya sa men’s doubles sa Southeast Asian Games sa Vietnam (kasama si Fil-American na si Treat Huey) at sa Cambodia (kasama si Francis Casey Alcantara).

Ang pickleball ay kasalukuyang pinakamabilis na lumalaking isport sa buong mundo at tiyak na bahagi ang Pilipinas nito, nakararanas ng lokal na boom na maihahambing sa badminton noon.

“That is why eyes are on us. They want to see what we can bring. And many will be surprised,” tugon ni Philippine Pickleball Federation President Shery Cu.

Magpapadala ang Pilipinas ng kabuuang 38 manlalaro na lalahok sa Open division, Under-18, Under-14, Kids at Seniors divisions ng kaganapan na may mahigit 4,000 kalahok.

Ayon kay Cu, nabuo ang team matapos ang halos anim na buwan ng lokal na kompetisyon, at habang ang ilang slots ay bukas na pinili base sa kasalukuyang ranggo ng mga manlalaro, ang iba naman ay nakapasok sa pamamagitan ng tryouts.

Kabilang sa mga koponang mabigat talunin ang Vietnam at Estados Unidos. Itinuturing na pinaka-kompetitibo ang edisyon ngayong taon sa kasaysayan ng kaganapan.