PASAHERONG NAGBIRO NA MAY “BOMBA” INARESTO SA TACLOBAN AIRPORT

ISANG babaeng pasahero ang inaresto matapos umanong magbiro tungkol sa bomba habang sakay ng isang eroplano sa Daniel Z. Romualdez Airport sa San Jose, Tacloban City, Leyte, noong Linggo, Agosto 31, 2026.

Sa ulat ng pulisya, nangyari ang insidente habang ang pasahero ay nasa galley ng isang eroplano patungong Maynila. Lumapit ang pasahero sa isang miyembro ng cabin crew upang humingi ng tulong sa pagkuha ng kanyang laptop, na hindi sinasadyang naiwan niya sa departure area.

Agad na nakipag-ugnayan ang miyembro ng cabin crew sa ground crew para sa isang anunsyo sa radyo tungkol sa nawawalang laptop.

Natagpuan ng isang airline personnel ang laptop at ibinalik ito sa may-ari. Gayunpaman, bago ang turnover, hiniling sa pasahero na buksan ang laptop para sa beripikasyon ngunit sumagot ang pasahero sa katutubong wika, “Ay, may bomba ’yan”.

Agad na isinailalim ang pasahero sa mga karaniwang security protocol at inaresto ng mga tauhan ng PNP Aviation Security Group.

Inihahanda na ng PNP AVSEGROUP ang naaangkop na kasong kriminal para sa posibleng paglabag sa Presidential Decree No. 1727, o ang Anti-Bomb Joke Law, habang nagpapatuloy ang imbestigasyon. (JOJO SADIWA)